«Jurtqa jaqyn politsiia» qaǵidatyn iske asyrý sheńberinde Mańǵystaý oblysynda politsiianyń 49 tirek pýnkti salynady. Bul týraly Ishki ister ministri Erlan Turǵymbaev óńirge jumys sapary barysynda málimdedi, dep habarlaidy "Ult aqparat".
Oblys ákimi Serikbai Turymovpen kezdesý barysynda IIM basshysy quqyq buzýshylyqtyń aldyn alýda ýchaskelik inspektorlar jumysynyń mańyzy zor ekenin atap ótti. Sondyqtan oblysta ýchaskelik pýnkter jelisin qurý qolǵa alynǵan. Osy jyldyń aiaǵyna deiin óńirde osyndai 14 pýnkt salynady.
Elimizdiń bas politseii Politsiia departamentiniń óńirdegi birqatar nysanyn aralady. Olardyń qatarynda Aqtaý qalasynyń jaǵalaýynda ornalasqan «Kaspii» modýldik statsionarlyq beketi bar. Beinekameralardyń kómegimen bul beket jaǵalaý aimaǵyn tolyq baqylaýdy júzege asyrady jáne táýlik boiy qoǵamdyq qaýipsizdikti qamtamasyz etedi.
Qazirgi ýaqytta Aqtaý qalasynda 127 kamera jumys isteidi jáne jaqyn arada taǵy 600 kamera ornatý josparlanýda.
Sonymen qatar, ministr quqyqtyq tártipti qamtamasyz etýdegi eriktilerdiń rólin erekshe atap ótti. Óńirde myńnan astam adam politsiiaǵa óz erkimen kómektesýde. Olar joǵalǵan adamdardy izdeýge, reidtik jáne aldyn alý is-sharalaryn júrgizýge qatysady. Ýchaskelik jáne patrýldik qyzmetkerlerimen birge olar quqyqtyq túsindirý jumystaryn júrgizedi. Erlan Turǵymbaev eriktilerdiń belsendi azamattyq ustanymyn joǵary baǵalap, yntymaqtastyq úshin alǵysyn bildirdi.
IIM basshysy sondai-aq Mańǵystaý oblysyndaǵy politsiia murajaiynda bolyp, ishki ister organdarynyń ardagerlerimen kezdesý ótkizdi. Olardyń bastamalary men usynystaryn tyńdady. Ardagerler ýchaskelik inspektorlarǵa óz erikterimen kómektesýge niet bildirip, árbir tirek pýnktine ózderin bir-birden bekitýdi usyndy.
Politsiia nysandaryn aralaý kezinde Erlan Turǵymbaev el basshylyǵynyń quqyq qorǵaý organdaryn reformalaý jónindegi tapsyrmalarynyń oryndalýyn barysyn tekserdi, sondai-aq óńirdegi politsiia qyzmetiniń 2021 jylǵa arnalǵan basym baǵyttaryn aiqyndady.
Aita keteiik, keshe QR Ishki ister ministri Erlan Turǵymbaev jumys saparymen Atyraý oblysynda bolǵan edi.
