Ulttyq biryńǵai testileýdiń naqty nátijesi tamyz aiynyń sońynda belgili bolady. Bul týraly QR BǴM Ulttyq testileý ortalyǵy direktorynyń orynbasary Naýjan Didarbekova aitty, dep habarlaidy QazAqparat.
«UBT-nyń birinshi kúngi qorytyndysyna keler bolsaq, shekti baldy jinaǵandardyń sany 4 222 adamdy quraidy. Bul test tapsyrýshylardyń barlyǵynyń 68,3 paiyzyna teń. Al shekti balldy jinai almaǵandar - 1 964 test tapsyrýshy, iaǵni 31,7 paiyz. 130 balldan joǵary jinaǵandar - 39 túlek. Qazirgi tańda appeliatsiiaǵa ótinishter qabyldanyp jatyr. Erejege sáikes 13:00-ge deiin ótinishter qabyldanady», - dedi ol Ortalyq kommýnikatsiialar qyzmetindegi brifing barysynda.
Onyń atap ótýinshe, jergilikti appeliatsiialyq komissiia ótinishterdi qanaǵattandyrǵan jaǵdaida respýblikalyq appeliatsiialyq komissiiaǵa naqty sheshim qabyldaý úshin joldanady. Nátijesi búgingi kúnniń sońyna deiin beriledi.
«Jalpy, UBT-nyń sońǵy nátijeleri tamyz aiynda naqty bolady. Óitkeni, biyl norma engizildi. Sol normaǵa sáikes, 25 tamyzǵa deiin barlyq testileý barysyndaǵy beinejazbalarǵa arnaiy baǵdarlamanyń kómegimen taldaý júrgizedi. Bul rette eger testileý barysynda test tapsyrýshy tyiym salynǵan zattardy paidalanǵany anyqtalǵan jaǵdaida olardyń nátijeleri joiylady. Soǵan orai eger ol memlekettik bilim berý grantynyń iegeri bolsa, onda grant nátijesi de joiylýy múmkin», - dedi ortalyq direktorynyń orynbasary.
Sonymen qatar, ol biylǵy erekshelikterge sáikes, sanitarlyq-epidemiologiialyq jaǵdaiǵa bailanysty qatań sharalar qabyldanǵanyn aitty.
«Keshe dene qyzýy bar 2 adam testileýge jiberilmedi. Olarǵa basqa kúni bólek aýditoriiada test tapsyrý múmkindigi uiymdastyrylady», - dedi Naýjan Didarbekova.
