Elimizdiń bilim jáne ǵylym ministri Erlan Saǵadiev UBT-ǵa qatysýshylardy tynyshtyq saqtaýǵa shaqyrdy, - dep habarlaidy Tengrinews.kz tilshisi.
"Barlyǵymyz tynysh, ýaiymdamai tapsyrǵanymyzdy qalaimyn. Shyn máninde suraqtar qiyn emes, kópshiligi. Ár jyl saiyn óte kóp bala UBT tapsyrady, buǵan qýanyshtymyz. Ýaqyttaryńyz bar, asyǵýdyń qajeti joq", - dedi ol.
"Bastysy - UBT aldynda uiqyny qandyrý kerek. Ekinshisi - tynyshtanyp, den qoiý", - dedi ministr.
Qazaqstanda mektep túlekterine Ulttyq biryńǵai testileý bastaldy. UBT elimizde osymen 15-shi ret ótip jatyr. 2017 jyldan bastap testileý formaty ózgergenin aita keteiik. Endi synaq joǵary oqý oryndaryna túsýge emtihan ári bilim berý granttaryn alý mehanizmi retinde qarastyrylady.
Bilim jáne ǵylym ministri Erlan Saǵadievtyń aitýynsha, biyl testileýdiń formatynda sol kúiinde qalady, tek tapsyrýshylarǵa qolaily bolýy úshin azdaǵan ózgeris engizilgen. Aita keteiik, biyl testileý 20 maýsym men 1 shilde aralyǵynda ótedi.
UBT-nyń biylǵy ótý tártibi men qurylymy ótken jylmen salystyrǵanda, ázirge túbegeili ózgeriske ushyraǵan joq. Jýyq arada Bilim jáne ǵylym ministrligi asa qatty ózgeris engizbeidi dep úmittenemiz. Olai bolmaǵan jaǵdaida, oqýshylar men ata-analardy stress jaǵdaiyna túsirýi múmkin", - degen edi ministr.
Aita keteiik, ótken jyly Ulttyq biryńǵai testileý elimizdiń 165 UBT ótkizý pýnktterinde 2017 jyldyń 20-27 maýsymy aralyǵynda jańa formatta ótkizildi. UBT-ǵa qatysýǵa 10 (11) synyptardyń 92 827 túlegi ótinish berip, olardyń 67 627 (76,3 paiyz) qazaq tilinde jáne 20 968 (23,6 paiyz) orys tilinde tapsyrýǵa ótinish bergen. Fakt boiynsha, 88 583 adam testileýge qatysyp, ótinish berýshilerdiń 95,4 paiyz qurady.
