Ulttyq testileý ortalyǵynyń direktory Rýslan Emelbaev UBT-nyń ornyna jazbasha emtihandy qaitarý týraly usynysqa pikir bildirdi, dep habarlaidy QazAqparat.
«Májilis depýtattary UBT-nyń ornyna joǵary oqý ornyna túsýdiń jazbasha emtihanyn balama retinde qoldanýdy usynǵan bolatyn. Bul másele kún tártibinde qaralyp jatyr ma?» dep surady jýrnalist ortalyq kommýnikatsiialar qyzmetinde ótken brifingide.
«Ulttyq biryńǵai testileý 2004 jyly alǵash engizilgen kezde úlken maqsat qoiylǵan edi. Muny erekshe atap ótý kerek, óitkeni aýyl balasynyń joǵary oqý ornyna túsýine kóptegen jaǵdai jasaldy. Árine, bul qazirgi keremet minsiz emtihan túri dep aita almaimyz. Biraq qolda bar, qoldanysta bolǵan emtihan túrleriniń ishindegi tiimdisi - osy UBT bolyp tur. Bizdiń ortalyqtyń basty maqsaty – emtihandy adal ótkizý. Akademiialyq adaldyq – qazirgi tańda qoǵamdaǵy eń ózekti máseleniń biri. 2019 jyly testke kirgenderden 128 myń tyiym salynǵan zat alynsa, biyl 400 ese azaiyp otyr. Bul ashyqtyqtyń nátijesi dep oilaimyn», - dedi ol.
Sondai-aq, ol, biylǵy UBT-da suraqtardyń sapasyna kóp kóńil bólingenin aitty.
«UBT nátijesi boiynsha eń kóp syn men daýǵa qalatyn pán Qazaqstan tarihy bolatyn. Qazirgi suraqtar jattaýdan góri fýnktsionaldyq saýatqa beiimdeligen. Biyl Qazaqstan tarihynan mán-mátin suraqtarynyń engizilýi de - sonyń bir kórsetkishi. Al jazbasha emtihan júiesine kóshý máselesi meniń quzyretime kirmeidi. Bizdiń mindet – qazirgi UBT-nyń ashyq ári adal ótýin, ondaǵy suraqtardyń sapaly bolýyn qamtamasyz etý», - dedi Ulttyq testileý ortalyǵynyń direktory.
