Biyl Ulttyq biryńǵai testileýge qatysýǵa ótinishter alǵash ret Ent2020.testcenter.kz saitynda onlain qabyldanýda. Bul týraly «ANTIKOR» ortalyǵy alańynda ótken onlain-dialog barysynda QR Bilim jáne ǵylym ministrligi Ulttyq testileý ortalyǵynyń direktory Didar Smaǵulov aitty, dep habarlaidy QazAqparat.
Naqtyraq aitqanda, «Adal Kómek» jobasy aiasynda QR Bilim jáne ǵylym ministrligi Ulttyq testileý ortalyǵynyń direktory Didar Smaǵulov akademiialyq ádildikti nyǵaitý jáne UBT kezinde qoǵamdyq baqylaýdy kúsheitý maqsatynda onlain-dialogqa qatysty. Málim etilgendei, biyl UBT maýsym aiynyń sońy men 5 shilde aralyǵynda ótedi. Biyl shamamen 120 myń túlek jáne orta arnaýly bilimi bar 15–20 myń azamat UBT tapsyrady.
Qazirgi Ulttyq testileý ortalyǵy qujattardy qabyldaý jumystaryn atqarýda. Biyl alǵash ret UBT-ǵa qatysýǵa ótinishter Ent2020.testcenter.kz saitynda (10 mamyrǵa deiin) onlain rejimde qabyldanady. Bilim jáne ǵylym ministrligi UBT-ny dástúrli formatta qaǵaz túrinde ótkizýdi josparlap otyr.
Didar Smaǵulovtyń aitýynsha, koronovirýstyń taralýyna bailanysty qosymsha sanitarlyq shekteý sharalary qabyldanady. Mysaly, eger buryn aýditoriialarda 150-ge jýyq adam bolsa, qazir olar áldeqaida az bolmaq. Olardyń arasyndaǵy qashyqtyq uzartylyp, jeke qorǵanys quraldaryn (maskalar, qolǵaptar, antiseptikter) paidalaný mindetteledi. Bul sharalar bilim alýshylardyń qaýipsizdigi úshin QR Densaýlyq saqtaý ministrligimen birlesip qabyldanǵan.
«UBT-ǵa daiyndaý úshin Ent2020.testcenter.kz saity ár pán boiynsha tegin testileýdiń 70 nusqasyn ornalastyrdy. Ortalyqtyń bastamasymen Sybailas jemqorlyqqa qarsy is-qimyl agenttigi Arnaiy monitoring tobynyń múshelerimen birlese otyryp, bilim berý uiymdarynyń testileýge daiyndyǵy men ony ótkizýdegi qyzmetin baqylaý, sondai-aq uialy telefondarmen kirýdi boldyrmaý maqsatynda ótken jyldan bastap baqylaý júrgizedi», - delingen Sybailas jemqorlyqqa qarsy is-qimyl agenttigi Nur-Sultan qalasy boiynsha departamenti parasattylyq basqarmasy taratqan baspasóz baianynda.
Sonymen qatar spiker testileý ótetin barlyq aýditoriiadan onlain transliatsiia týraly da aitty. Osylaisha, kez kelgen adam protsesti baqylap, testileý kezinde ereje buzý faktilerin baqylai alady. Al anyqtalǵan jaǵdaida ortalyqqa habarlaýǵa bolady. Bul júie avtomatty rejimde smartfondardy paidalaný faktilerin anyqtaidy.
