UBT-dan eń joǵary ball alǵan Shiara Qudaibergenova testileýde 140 suraqtyń barlyǵyna durys jaýap berýge bolatynyna senbegen, - dep habarlaidy Tengrinews.kz tilshisi.
№ 123 mektep-gimnaziiasynyń túlegin búgin qala ákimi Baýyrjan Baibek quttyqtady. Qala ákimi túlekke noýtbýk pen kitap syilady.
"Testileýge 9-synyptan bastap daiyndaldym. Túrli testter men tapsyrmalardy oryndap júrdim. Birden aitaiyn, bulai múmkin dep tipti oilamadym. Daiyndyq kezinde testileýden 120, 130 ball alyp júrdim. Biraq meniń maqsatym - 140 ball alý boldy, men oǵan sendim", - dedi Shiara Qudaibergenova.
Túlektiń aitýynsha, ol emtihannan joǵary ball alǵany jaily týystarynan bilgen. Bul týraly oǵan aǵasy telefonmen habarlaǵan.
"Testileýdiń nátijesi jaily estigende men anammen meshitte bolǵanmyn. Testileýdiń qorytyndysyn kútip, duǵa oqyp jattym. Sol sátte aǵam habarlasty, jylap tur, ar jaǵynda barlyǵy shýlap jatty. Eshteńe túsinbedim. Qoryqqanymnan "Aǵa, qansha ball aldym?" dep suradym, ol bolsa "140!" dep aiǵailady. Qatty qýandym! Barlyǵyna alǵys aitamyn, gimnaziia muǵalimderine, solardyń arqasynda men osylai daiyndala aldym. Sondai-aq, qoldaý kórsetken ata-anama alǵys aitamyn. Eń birinshi kezekte, Elbasyna alǵys aitamyn", - deidi Shiara.
Conymen qatar, Shiara súiikti pánderi geografiia men matematika ekenin aityp jáne Nazarbaev ýniversitetine oqýǵa túseiin dep jatqanyn aitty.
"Qazir sondai baqyttymyn, qýanyshtymyn. Men qarapaiym otbasynan shyqqanmyn: otbasynda jalǵyz qyzbyn, inim bar, ol litseide oqidy. Ata-anam da qarapaiym otbasynan. Kásipkerler", - deidi túlek.
Almaty qalalyq Bilim berý basqarmasynyń basshysy Gúlnar Hodjabergenova biyl Almatyda 7 635 túlektiń UBT tapsyrǵanyn aityp ótti. Qala boiynsha orta ball 101,2 ball eken.
Eske salaiyq, keshe, 25 maýsymda almatylyq túlek Shiara Qudaibergenovanyń UBT-dan 140 ball alǵany habarlanǵan edi. Bul málimetti bilim jáne ǵylym vitse-ministri Ashat Aimaǵambetov rastaǵan.
Sondai-aq, osyǵan deiin Shiara Qudaibergenova oqyp bitirgen № 123 mektep-gimnaziianyń direktory Baǵila Áshimbaeva túlek jaily aityp bergen bolatyn. Baǵila Áshimbaevanyń aitýynsha, Shiara bul mektepte birinshi synyptan bastap oqyǵan. Jastaiynan bilimge qushtar, izdenimpaz bolyp ósken ol árdaiym mekteptiń qoǵamdyq jumystaryna belsene aralasqan.
