UBT-2020-nyń alǵashqy kúni eń joǵary baldy Túrkistan oblysy Ordabasy aýdanynan Abzal Ábdimanap jinady. Tespe orta mektebiniń túlegi 140 baldyń 138-in aldy. Bul týraly BǴM baspasóz qyzmetinen málim boldy, dep habarlaidy "Ult aqparat".
Mektepti jaqsy úlgerimmen bitirgen Abzal UBT-da biologiia jáne himiia pánderin tańdaǵan. Endi meditsina fakýltetine oqýǵa túsýdi josparlap otyr.
«Men UBT-ny 21 maýsym kúni tapsyrdym. Testileý suraqtary maǵan ońai boldy, ózim oqyǵan, jaqsy biletin taqyryptar keldi. Test tapsyrý kezinde baiqaýshylar bárin qarap júrdi, joǵary baldy ózimniń taza bilimimmen alyp shyqtym», – dedi Abzal Ábdimanap.
Ózine senimdi túlek bolashaqta tis dárigeri bolýdy qalaidy. Talapker qatarlastaryna da tek óz bilimine senýge keńes berip, sáttilik tiledi.
«Endi ózimniń júrek qalaýymmen meditsina salasyna túskim keledi. Bolashaqta aǵalarym siiaqty tis dárigeri bolsam deimin. Ózimnen keiin tapsyratyn talapkerlerge shpargalka syndy tyiym salynǵan zattardy alyp kirmeýge keńes beremin. Óitkeni, ony alyp kire almaisyzdar, kameradan bári kórinedi, baiqaýshylar da qarap turady. Qatarlastaryma aitarym, tek ózderińizge senińizder, sizderge sáttilik tileimin», - dedi túlek.
Abzal bos ýaqytynda kitap oqyǵandy, sportpen ainalysqandy unatady. Túlek UBT-da 120-dan astam ball jinaýdy aldyna maqsat qoiǵan eken.
«Men aldyma maqsat qoiyp, qashanda soǵan jetýge talpynamyn. UBT-ǵa daiyndalyp júrgende 120 ball alamyn dep oiladym. Qazir 138 alǵanyma óte qýanyshtymyn», – dedi Abzal.
Budan buryn habarlanǵandai, biyl 21 maýsym men 5 shilde aralyǵynda elimizdiń barlyq óńirinde Ulttyq biryńǵai testileý ótedi.
