Ulttyq biryńǵai test tapsyrǵan túlekterden respýblikalyq apelliatsiialyq komissiiaǵa 111 ótinish tústi. Bul týraly búgin QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev aitty, dep habarlaidy QazAqparat.
«20 maýsymnan bastap elimizde UBT bastaldy. Búgingi kúnge deiin bes lek ótti. Búgin testileýdiń altynshy kúni ótip jatyr. Testileýge ótinish bergen 74 365 túlektiń 71 227-si qatysty. Bul ótinish bergenderdiń 96 paiyzyn qurap otyr. Onyń ishinde qazaq tilinde - 56684 túlek, orys tilinde - 14455. Aǵylshyn tilinde 87 túlek tapsyrdy. 24 maýsym kúni eń joǵary nátije 140 ball tirkeldi. Ol Túrkistan oblysy Saryaǵash aýdanynyń túlegi - «Altyn belgi» iegeri Jubai Qasymjan Ádiljanuly. Keshe ǵana UBT tapsyrǵan bolatyn», - dedi ol Ortalyq kommýnikatsiialar qyzmetindegi brifingte.
Onyń atap ótýinshe, búgingi kúnge deiin eń kóp tańdalyp otyrǵan pánder tizbesinde fizika, matematika, biologiia ján himiia bar.
«UBT-ǵa erekshe bilim berý qajettiligi bar 21 bala qatysty. Olarǵa arnaiy jeke aýditoriia berilgen, arnaiy mamandar jumys istedi. UBT ótkizý tehnologiiasyn saqtaý maqsatynda óńirlerge jiberilgen ministrlik ókilderi ony qamtasyz etti. Barlyq aýditoriia uialy telefon signaldaryn basatyn quraldarmen, beinekameralarmen jabdyqtalǵan. Testileý ótkizý merziminde Ulttyq testileý ortalyǵynyń call-ortalyǵyna 546 qońyraý tústi. Olardyń kóbisi - tamyz aiynda bolatyn UBT jáne joǵary oqý oryndaryna túsý boiynsha suraqtar. UBT-2019 nátijeleri edu.mail.kz saitynda jáne telegram-botta - edu.gov.kz bot, sonymen qatar ulttyq testileý ortalyǵynyń saitynda - www.testcenter.kz jariialandy. Búgin saǵat 13:00-ge deiin jergilikti jerlerde apelliatsiialyq komissiia jumys istep jatyr. Respýblikalyq apelliatsiialyq komissiiaǵa jalpy 111 ótinish kelip tústi, onyń ishinde 63-i qanaǵattandyryldy, 81-i qaitaryldy», - dedi Á.Toibaev.
