Qazaqstanda negizgi Ulttyq biryńǵai testileý 5 shildede aiaqtalady. Búginge deiin 215 talapker emtihan tapsyrý múmkindiginen aiyryldy, dep habarlaidy QazAqparat.
UBT-nyń aralyq nátijesin usynǵan Ulttyq testileý ortalyǵynyń málimetine sáikes, búginge deiin túlekterdiń 75% – qazaq tilinde, 24,8% - orys tilinde, 0,1% aǵylshyn tilinde emtihannan ótti.
Shekti baldy 67% jýyq talapker ǵana jinai alǵan. Ortasha kórsetkish 66 baldy qurady.
Búgingi tańda smartfon, shpargalka jáne basqa da tyiym salynǵan zattardy alyp ótpek bolǵan 215 talapker test tapsyrý múmkindiginen aiyryldy. Testileý kezinde erejelerdi buzǵany úshin aýditoriiadan 199 adam shyǵarylyp, olardyń da nátijeleri joiyldy.
«Testileýdiń besinshi aptasy aiaqtaldy, barlyǵy shtatty rejimde ótip jatyr. Jalpy negizgi Ulttyq biryńǵai testileýge qatysýǵa 290 myńǵa jýyq ótinish kelip tústi, olardyń ishinde 160 myń ótinish birinshi múmkindikke, 130 myń ótinish ekinshi múmkindikke berilgen. Qazirgi tańda 170 myń ret test tapsyryldy, iaǵni talapkerler ekinshi múmkindigin paidalana bastady. Ótken aptamen salystyrǵanda ortasha ball 1 balǵa joǵarylady», – dep atap ótti Ulttyq testileý ortalyǵynyń direktory Rýslan Emelbaev.
Eske salaiyq, UBT-ǵa kirgizý kezinde úsh deńgeili júie qoldanylady: Face ID jeke basyn sáikestendirý arqyly, jeke kýálik boiynsha, sondai-aq otyrǵyzý ornynda jeke basyn sáikestendirý. Biyl testileý «1 kompiýter – 2 kamera – 1 testilenýshi» qaǵidatymen ótedi. Eger buǵan deiin testileý protsesin ár kompiýterdiń joǵarǵy jaǵynan baqylap otyratyn bir kamera ǵana bolsa, endi testilenýshiniń jeke basyn sáikestendirýge jáne bógde adamdardyń kirýine jol bermeýge múmkindik beretin ekinshi (frontaldy) kamera ornatylǵan.
Talapkerler testileý aiaqtalǵannan keiin 30 minýt ishinde apelliatsiiaǵa bere alady.
