QR Bilim jáne ǵylym vitse-ministri Miras Dáýlenov biylǵy Ulttyq biryńǵai test tapsyrý formatyna engizilgen ózgerister jaiynda aitty, dep habarlaidy QazAqparat.
«Bizde testileý uzaqtyǵy 4 saǵatty, iaǵni 240 minýtty quraidy. Osy oraida myna jaittarǵa nazar aýdarǵym keledi. Buryndary biz jaýaptardy toltyrýǵa, boiaýǵa, testileýdiń ózin uiymdastyrýǵa, iaǵni, barlyǵynyń aýditoriiada otyrýyna ýaqyt bóletinbiz. Al búginde UBT tapsyrýǵa kirisetin mektep túleginde 240 minýt bolady. Demek, ol «testileýdi bastaý» túimeshegin bastaǵan sátten bastap test tapsyrady. Soǵan orai túlek basqa túlekterdiń ýaqytyna qaramastan test tapsyrýǵa kirisip, bitken soń «testileýdi aiaqtaý» túimeshegin basady», - dedi ol ministrliktiń apparat jinalysynda.
Onyń atap ótýinshe, UBT barysynda túlek qate jibergen jaýaptaryn túzetýge de múmkindik alady.
«UBT-ny qaǵaz túrde ótkizýden elektrondy formatta tapsyrýdyń taǵy bir basymdyǵy jaýapty ózgertýge bolady. Qaǵaz túrinde jaýap boialǵannan keiin ony ózgertý múmkin emes. Al elektrondy formatta túlek qandai da bir tapsyrmanyń durys jaýabyn tapsa, qandai da bir aqparatty eske túsirse, onda suraqqa qaita oralyp, jaýabyn ózgerte alady. Onyń ústine ózgertilgen jaýap UBT aiaqtalǵannan soń jáne saqtalǵannan keiin de jazylady», - dedi vitse-ministr.
