Biylǵy Ulttyq biryńǵai testileý kezinde talapkerlerden 90 375 uialy telefon tárkilendi, dep habarlaidy QazAqparat.
«Ulttyq biryńǵai testileý barysynda 90 375 uialy telefon, 28 344 kalkýliator jáne 1 867 shpargalka tárkilendi», - dep jazdy Ulttyq biryńǵai testileý ortalyǵy direktorynyń mindetin atqarýshy Didar Smaǵulov óziniń Facebook paraqshasynda.
Sondai-aq, ortalyq basshysy ata-analardy balalardy adaldyqqa tárbieleýge shaqyrdy.
«Qurmetti ata-analar, balalardy UBT júiesin aldaýǵa emes, adal báseke jáne naǵyz bilimmen jarysýǵa tárbieleiik», - dedi ol.
Eske sala ketsek, Bilim jáne ǵylym ministri Ashat Aimaǵanbetov ulttyq testileýde uialy telefonmen ustalǵan túlekterge shara qoldanylatynyn aityp ótken bolatyn.
«Ulttyq biryńǵai test tapsyrýdyń óz erejesi bar. Sol erejege sáikes komissiialarymyz jumys isteitin bolady. Árine, keleńsiz jaǵdailardy boldyrmai, olardyń aldyn alýymyz kerek. Máselen, telefon, basqa nárseler alyp kirse, onda oǵan tyiym salyp, toqtatýymyz kerek. Biraq, bul psihologiialyq ahýaldy ózgertpeýi tiis. Sondai tapsyrma berip otyrmyz», - dedi ministr.
Aita ketsek, biyl UBT-ǵa qatysýǵa 117 242 talapker ótinish bildirdi. Onyń ishinde osy jyly mektep bitirýshiler sany 96 380 adamdy (ótken jylǵy mektep bitirýshiler sany - 20 862) qurady.
