Ýákiletti organdar kez kelgen jańalyqty engizbes buryn jergilikti halyqpen, biznes-qaýymdastyqpen jáne memlekettik organdarmen jan-jaqty túsindirý jumystaryn júrgizýi qajet. Bul týraly búgin QR Parlamenti Senatyndaǵy zań shyǵarý protsesin jetildirý máseleleri jónindegi Úkimet saǵatynda joǵary palata spikeri Qasym-Jomart Toqaev aitty, dep habarlaidy QazAqparat tilshisi.
Senat tóraǵasynyń aitýynsha, zańnamalyq nemese zańǵa táýeldi deńgeilerde reglamentteý úshin kún tártibine qoiylatyn máselelerdiń arajigin ajyratý - zań shyǵarý júiesindegi kúrdeli máselelerdiń biri bolyp otyr. El Konstitýtsiiasynyń 61-babynyń 3-tarmaǵynda zańnamalyq retteýdiń shegi naqty aiqyndalǵanyna qaramastan jekelegen máselelerdiń mańyzyn joǵary qoiý úshin belgilengen shekterdi buzýǵa degen umtylystar áli de oryn alýda.
«Sonyń saldarynan zań shyǵarý qyzmeti taqyryptyq jaǵynan tarylyp, zańdar arqyly vedomstvolyq, salalyq, óńirlik jáne basqa da memlekettik aýqymnan tys múddelerdi qanaǵattandyrý úrdisi týyndap otyr», - dedi ol.
Sonymen qatar Qasym-Jomart Toqaev Memleket basshysy altynshy shaqyrylymdaǵy Parlamenttiń úshinshi sessiiasynyń ashylýynda jańadan qabyldanatyn zańdar boiynsha quqyqtyq túsindirý jumystaryn júrgizýdiń mańyzdylyǵyna erekshe nazar aýdarǵanyn eske saldy.
«Bizdiń oiymyzsha, bul másele túbegeili jańa kózqarastar men tásilderdi talap etedi. Memlekettik organdar osy másele boiynsha tsifrlyq tehnologiialar men qalyń jurtshylyq arasynda keńinen taralǵan áleýmettik jelilerdi tiimdi paidalanyp, neǵurlym belsendi jáne jańa kózqarastardy ustanýy qajet. BAQ keńistiginde keńinen jariialai otyryp, ózekti máseleler boiynsha beinerolikter kórsetý, baspasóz-konferentsiialaryn, dispýttar men pikirtalastar ótkizý zań shyǵarmashylyǵy protsesiniń ajyramas bóligine ainalýy tiis. Ýákiletti organdar kez-kelgen jańalyqty engizbes buryn jergilikti halyqpen, biznes-qaýymdastyqpen jáne memlekettik organdarmen jan-jaqty túsindirý jumystaryn júrgizýi qajet», - dedi Q.Toqaev.
Onyń atap ótýinshe, negizgi quqyq salalaryn damytýdyń ornyqty tásilderin ázirleýmen ainalysatyn salaaralyq ǵylymi institýttardyń joqtyǵy da sheshimin tappaǵan máselelerdiń qatarynda.
«Mundai institýttar depýtattarǵa konsýltatsiialyq, ádistemelik, aqparattyq jáne quqyqtyq kómek kórseter edi. Ázirge biz Ádilet ministrligi janyndaǵy Zańnama institýtynyń kómegine júginemiz», - dedi ol.
Sonymen qatar Senat spikeri halyqaralyq sharttardy jasasý, olardyń iske asyrylýyn baǵalaý, sondai-aq olardy ulttyq zańnamaǵa engizý barysyndaǵy anyq jáne aiqyn júieniń bolmaýy da airyqsha nazar aýdarýdy qajet etetindigin basa aitty.
«Quqyqtyq monitoring institýtyn odan ári damytý úshin júieli jáne uiymdastyrýshylyq sipattaǵy sharalardy qabyldaý talap etiledi. «Memlekettiń salaýaty zańdardan bastalyp, zańdylyqpen aiaqtalady» degen belgili tujyrym zańdardy tiimdiligine qarap qabyldaýdyń asa qajet ekenin kórsetedi», - dedi Q.Toqaev.
