Almaty oblysynda ekinshi jáne úshinshi órt oshaqtaryn sóndiririlip jatyr. Bul týraly QR TJM resmi ókili Talǵat Ýáli málim etti, dep habarlaidy "Ult aqparat".
«15 sáýir kúni saǵat 09.45-te Almaty oblysy Balqash aýdanynyń Jideli aýyldyq okrýginen 25 shaqyrym jerde qurǵaq shóp pen qamys órtendi. Órt kólemi anyqtalyp jatyr. Órt sharýa qojalyqtarynyń aýmaqtaryna jáne jeke demalys bazalarynyń jerlerine taraldy. Órt ornyna jedel túrde Balqash aýdanyna qarasty Qapshaǵai qalasy men Baqanas aýylynyń órt sóndirý bólimderinen 18 qyzmetker men 5 birlik tehnika jiberildi», - dedi ol.
Onyń atap ótýinshe, tótenshe jaǵdai ornyna barar joldyń nashar bolýyna bailanysty kúshter men quraldardyń qozǵalysy aitarlyqtai qiyndady. Órt ornyna deiingi qashyqtyq shamamen 180-200 shaqyrym. Telefon bailanysy bolmaǵandyqtan, jedel toptyń jeke quramy bailanysty uiymdastyrý úshin alyp júretin spýtnik terminaldarmen qamtamasyz etildi.
«13 sáýirden beri TJD men jergilikti atqarýshy organdardyń kúshteri jáne quraldary Balqash aýdanynyń Jeltorańǵy, Aqkól aýyldyq okrýgteriniń aýmaqtaryndaǵy oshaqtardy sóndirýde. Barlyǵy úsh órt oshaǵy bar. 20 gektar alańdyq quraityn alǵashqy oshaq saǵat 10.30-da sóndirildi. Ekinshi jáne úshinshi órt oshaqtaryn sóndirý jumystary jalǵasýda», - dedi resmi ókil.
Talǵat Ýáli qýraǵan aǵashtardyń janý oqiǵalarynyń jiileýine bailanysty 12 sáýirden bastap Balqash aýdanynda jedel shtab qurylǵanyn aitady. Onda Tótenshe jaǵdailar departamentiniń kúshteri men quraldary jumys isteidi. Qazaviaormanqorǵaý mekemesiniń ushaǵymen ýchaskelerdi aerovizýaldy tekserý uiymdastyryldy.
Buǵan deiin Almaty oblysyndaǵy órt saldarynan balyq sharýashylyǵyna ziian kelip, bir adam zardap shekkenin habarlaǵan edik.
