Foto: QR TJM
Tótenshe jaǵdailar birinshi vitse-ministri Ibragim Kúlshimbaev Abai oblysyndaǵy orman órti qashan tolyǵymen sónetinin aitty, dep habarlaidy Sputnik Qazaqstan.
Senat kýlýarynda jýrnalister Abai oblysyndaǵy órttiń qashan sónetinin surady.
"Jaqyn arada, órtti sóndirý tórt-bes kúnge deiin sozylýy múmkin", - dedi Kúlshimbaev.
Aita keteri, 14 maýsymda oblystaǵy órt oshaqtary oqshaýlanǵan edi. Sonymen qatar órt tolyq joiylǵanǵa deiin oqshaýlanǵan oshaqtardyń oryndaryna únemi sý tógý jáne órttiń shetine topyraq sebý júzege asyrylady.
Vitse-ministrdiń aitýynsha, Tótenshe jaǵdailar ministrliginde sý aǵyzatyn qurylǵymen jabdyqtalǵan 33 tikushaq bar. Biraq onyń tek 16-sy ǵana órtti sóndirýge arnalǵan. Qalǵandary izdeý, barlaý jumystary úshin.
"Biraq olardyń bárin bir mezette paidalaný múmkin emes, sebebi qandai da josparly jumystar bolady. Sondyqtan olardyń jartysyna jýyǵy únemi jóndeýde turady. Al órt sóndiretin ushaqtarymyz joq, biz oǵan aqsha suradyq, biraq qarjy qarastyrylmady. Sol sebepti biz áli ushaq satyp alǵan joqpyz", - dedi ol.
