Memleket basshysy Qasym-Jomart Toqaevtyń Qordai aýdanyndaǵy oqiǵa saldaryn joiý jónindegi tapsyrmasy boiynsha Úkimet komissiiasynyń quramymen Qazaqstan halqy Assambleiasynyń Tóraǵasynyń orynbasary Janseiit Túimebaev senbi kúni Jambyl oblysyna bardy, dep habarlaidy "Ult aqparat".
QHA baspasóz qyzmetiniń málimetinshe, Qordai aýdanyndaǵy Masanchi, Aýqatty, Sortóbe eldimekenderindegi jaǵdaimen tanysyp, jappai tóbeles saldarynan qaza bolǵan otbasylarǵa kóńil aitty. Aýrýhanada jatqan azamattardyń jaǵdaiyn bilip, jergilikti turǵyndarmen, aýdan aqsaqaldarymen, QHA múshelerimen, etno-mádeni birlestik basshylarymen kezdesýler ótkizdi.
Jeksenbide de komissiia jumysyn jalǵastyryp, qazaq-qyrǵyz shekara pýnktterindegi aýyl turǵyndarymen sóilesip, turǵyndardy úilerine qaityp oralýǵa shaqyrdy.
Sondai-aq Janseiit Túimebaev oryn alǵan oqiǵanyń tek turmystyq sipattaǵy kikiljiń ekenin taǵy da atap ótti.
«Óńirdegi turǵyndardyń qaýipsizdigi men quqyqtyq tártiptiń saqtalýyn qamtamasyz etý maqsatynda qurylǵan Úkimet komissiiasy oqiǵanyń saldaryn joiý boiynsha barlyq qajetti sharalardy atqarýda. Qaza bolǵandardyń týystary men jaqyndaryna tiisti kómek kórsetilip jatyr. Kináliler, jeke azamattar, ásirese kikiljińdi týdyrǵandar men arandatýshylar zańǵa sáikes qatań jazalanatyn bolady. Ultaralyq tatýlyq pen qoǵamdyq kelisim elimiz úshin eń qymbat qazyna ekenin umytpaýymyz kerek», dedi Janseiit Túimebaev.
