Qazaqstan Respýblikasynan tys jerlerde týǵan, biraq qazirgi ýaqytta el aýmaǵynda turaqty turatyn QR azamattary týǵan jeri retinde Qazaqstan Respýblikasynyń ákimshilik aýmaqtyq ornyn kórsete alady, dep habarlaidy Ult.kz tilshisi QazAqparat agenttigine silteme jasap.
Bul týraly búgin QR Ádilet ministrliginde Zań jobalaý qyzmeti máseleleri jónindegi vedomstvoaralyq komissiianyń kezekti otyrysynda talqylandy.
«Neke jáne otbasy kodeksiniń 188-babyna «Qazaqstan Respýblikasynan tys jerde týǵan, biraq qazirgi ýaqytta el aýmaǵynda turaqty turatyn QR azamattary bir ret óz týǵan jerin ózgertip, týǵan jeri retinde Qazaqstan Respýblikasynyń ákimshilik aýmaqtyq ornyn kórsete alatyny týraly» ózgeris enetinin oqydym. Bul norma ne týraly jáne ne úshin qajet?», - dedi «Samuryq-Qazyna» AQ quqyqtyq qoldaý jáne táýekelder boiynsha basqarýshy direktory Ǵani Bitenov «QR keibir zańnamalyq aktilerine memlekettik qyzmetter kórsetý máseleleri boiynsha ózgerister engizý týraly» Zań jobasyn talqylaý barysynda.
Onyń suraǵyna atalǵan zań jobasyn ázirleýge qatysqan QR Aqparat jáne kommýnikatsiialar ministrliginiń jaýapty hatshysy Janat Qojahmetov jaýap berdi.
«Bul bizdiń azamattarǵa yńǵaily bolýy úshin jasalyp otyr. Máselen, bala QR aýmaǵynan tys jerde dúniege keldi jáne týý týraly kýáliginde sol mekenjaiy kórsetilip turady. Esh qiyndyqtar týyndamaýy úshin ol týǵan jeri retinde Qazaqstan Respýblikasynyń ákimshilik aýmaqtyq ornyn kórsetkisi keledi. Sol úshin QR azamaty bolyp tabylatyn jandarǵa týǵan jerin bir ret ózgertýge múmkindik berýdi uiǵardyq. Bizdiń pikirimizshe, munda esh qiyndyq joq», - dedi J. Qojahmetov.
«Sonda ol adamdar týǵan jerin ózgertý arqyly prezidenttik sailaýǵa qatysa ala ma?» degen suraq qoiyldy. Bul suraqqa QR Parlamenti Májilisiniń depýtaty Maira Aisina jaýap berdi.
«Konstitýtsiiada týmysynan Respýblika azamaty bolyp tabylatyn, qyryq jasqa tolǵan, memlekettik tildi erkin meńgergen, Qazaqstanda sońǵy on bes jyl boiy turatyn jáne joǵary bilimi bar azamattyń prezidenttikke sailana alatyny jazylǵan. Bul Konstitýtsiiaǵa esh qaishy kelmeidi. Sondyqtan balalary ózge elde týǵan ata-analarǵa bir múmkindik berýdi sheshtik», - dedi Maira Aisina.
