2020-2021 jylǵy jylý maýsymynyń qorytyndysy boiynsha tutynýshylarǵa 415 mln teńgeniń jylý aqysy qaitarylady. Bul týraly QR Ulttyq ekonomika ministrligi Tabiǵi monopoliialardy retteý komiteti tóraǵasynyń mindetin atqarýshy Ashat Japsarbai málim etti, dep habarlaidy QazAqparat.
«Komitet pen onyń aýmaqtyq bólimshelerine 2020 jylǵa investitsiialyq baǵdarlamalar men tarif smetalaryn oryndaý týraly 1 203 tabiǵi monopoliia sýbektisinen 2 341 esep kelip tústi. Onyń ishinde búgingi kúni 798 sýbektiniń 1 389 esebi qaraldy. Qolda bar esepterdi taldaý nátijesinde 266 sýbektiniń óz mindettemesin oryndamaǵany anyqtaldy. Osyǵan bailanysty eldiń barlyq óńirlerinde jalpy somasy 10,2 mlrd teńgege ýaqytsha ótem tarifteri bekitildi. Bul tariftiń ósýin tejeitin tetik ekenin aitý kerek», - dedi ol ortalyq komýnikatsiialar qyzmetinde ótken brifingide.
Komitet tóraǵasynyń mindetin atqarýshy esepter áli qaralyp jatqanyn eske salyp, ýaqytsha ótem tarifteriniń somasy áli kóbeiýi múmkin ekenin aitty.
Sonymen qatar, Ashat Japsarbai 2020-2021 jyldardaǵy jylý berý maýsymynda tutynýshylarǵa 415 mln teńgeden astam qarajat qaitarylatynyn habarlady.
«Qarajatty qaita esepteý tutynýshynyń jeke shotynda kórinis tabady jáne jańa jylytý maýsymy bastalǵannan bastap avans (saldo) túrinde jeke jolmen jazylady», - dep túsindirdi komitet basshysy.
