Tutynýshylardyń quqyqtaryn qorǵaý salasynda shaǵymdardy qabyldaýdyń Biryńǵai aqparattyq júiesin qurylady. Bul týraly Parlament Májilisiniń jalpy otyrysynda tutynýshylardyń quqyqtaryn qorǵaý týraly zań jobasy qaraý kezinde Saýda jáne integratsiia ministri Baqyt Sultanov málim etti, dep habarlaidy QazAqparat.
Onyń sózine qaraǵanda, zańnamalyq ózgerister «bir tereze» qaǵidaty boiynsha tutynýshylardyń quqyqtaryn qorǵaý salasynda shaǵymdardy qabyldaýdyń Biryńǵai aqparattyq júiesin qurýdy eskeredi.
«Búgingi kúni memlekettik organdar men úkimettik emes uiymdar tutynýshylardyń quqyqtaryn qorǵaý salasyndaǵy óz róli men mindetterin árkelki túsinýi oryn alýda. Bul shynaiy statistikany qalyptastyrýǵa, osy saladaǵy júieli problemalardy anyqtaýǵa jáne sheshýge múmkindik bermeitindigi anyq. Barlyq «tutynýshylar qorǵaýshylaryn» atalǵan aqparattyq júiege shoǵyrlandyrý – shaǵymdardy berý rásimderin ońtailandyryp, olardy qaraý sapasynyń monitoringin jasaýdy qamtamasyz etedi. Sonymen qatar, obektivti statistikany qalyptastyra otyryp, analitikalyq eseptilik júiesin engizýge múmkindik beredi», - dedi ministr.
Shaǵymdardy taldaý nátijeleri Tutynýshylardyń quqyqtaryn qorǵaý jónindegi vedomstvoaralyq keńeste qaralatyn bolady. Ol problemalyq quqyqtyq aktilerdi dereý ózgertýge múmkindik beredi jáne memlekettik organdar qabyldaityn sheshimderdiń tiimdiligine tiisti baqylaýdy qamtamasyz etedi.
Sonymen qatar B. Sultanov tutynýshylardyń quqyqtaryn qorǵaý salasyndaǵy úkimettik emes uiymdardy qoldaý baǵytyna toqtaldy.
«Atap aitqanda, memlekettik áleýmettik tapsyrystyń qoldanysy keńeitiledi. Halyqtyń áleýmettik osal toptaryna quqyqtaryn qorǵaýǵa tegin ókildik qyzmetter kórsetý úshin qoǵamdyq uiymdarǵa memlekettik tapsyrys beriletin bolady. Budan basqa, tutynýshylardyń qoǵamdyq birlestikterine profilaktikalyq maqsatta qoǵamdyq baqylaýdy júzege asyrý boiynsha quzyreti beriledi. Ony ótkizýdiń tártibi men negizderi reglamenttelgen», - dedi vedomstvo basshysy.
Budan buryn habarlanǵandai, Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine tutynýshylardyń quqyqtaryn qorǵaý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy.
