Foto: Pexels.com
Ǵylymsyz órkendeý múmkin emes. Onyń el damýyndaǵy mańyzyna Almatydaǵy Memleket basshysynyń ǵalymdarmen kezdesýinde taǵy bir márte kóz jetkizdik. Jasampazdyq, jańashyldyq, bilimpazdyq jáne ǵylymǵa qushtarlyq – naǵyz ozyq elge kerek basty qasietter.
Olai bolsa, birinshi kezekte tutas qoǵam bolyp ǵylymdy jan-jaqty nasihattaýǵa kúsh salýǵa bet burý kerek. Bul baǵytta az jumys atqarylyp jatqan joq. Qazir «Ǵylym jáne tehnologiialyq saiasat týraly» zań jobasy Parlamentte qaralyp jatyr. Bul qujat atalǵan saladaǵy jyldar boiy qordalanǵan máselelerdi sheshýge muryndyq bolady degen senim mol.
Qazir memleket ǵalymdar men ǵylym jolyndaǵy mamandardy yntalandyrý tetikterin qarqyndy júzege asyryp keledi. Mysaly aldaǵy eki jylda jas ǵalymdardyń zertteýine biýdjetten 18 milliard teńge bólinedi. Al byltyr 284 jas ǵalym baspana aldy. Biyl taǵy 200 páter beriledi.
Memleket basshysy qazir – ǵylym men bilimniń zamany. Otanymyzdy kórkeitemiz desek, eń aldymen, osy eki salany damytýymyz kerek degendi bul joly da shegelep aitty.
«Shikizatqa arqa súiep otyrǵan el alysqa barmaidy. Bizge ǵalymdar, injenerler, ónertapqyshtar qajet. Mamandarymyz álemdik básekege tótep bere alatyndai bilimdi, bilikti bolýy kerek. Búginde alpaýyt elderdiń arasynda barlyq salada baqtalastyq órship tur. Biz osy kúrdeli kezeńde ekonomikanyń jańa úlgisine kóshe bastadyq. Ádil, inkliýzivti ári básekege qabiletti ekonomika qurýǵa kiristik. Ǵylym men innovatsiia onyń basty tiregi bolýǵa tiis», — dedi Memleket basshysy.
Rasymen, kóshke ilesetin emes, kóshti bastaityn elderdiń qatarynda bolýymyz kerek. Sol úshin barlyq múmkindikter bar. Elimizde ǵylymǵa bólinetin qarjy udaiy artyp keledi. Bilikti kadrlar ázirleýge arnalǵan grant sany sońǵy jyldary bir jarym ese artyp otyr. Qazaqstanda álemniń bedeldi 12 joǵary oqý ornynyń filialy jumys isteidi. Buǵan qosa, zertteý jumystarymen ainalysatyn ýniversitetter sany kóbeiýde. Jyl saiyn 500 ǵalym shetelde taǵylymdamadan ótedi. Buǵan qosa, jas ǵalymdarǵa myńdaǵan grant bólip jatyr. Munyń bári ǵylymdy damytý úshin jasalyp jatqan mańyzdy qadamdar. Bul týraly qarjy mamany Aibar Oljaev aitty.
