Foto: Tengrinews.kz
Almaty oblysy Talǵar aýdanynyń ákimdigi tórt jasar bala óliminiń mán-jaiyn aitty, dep jazady Sputnik Qazaqstan agenttigi.
Ákimdiktiń habarlaýynsha, qaiǵyly oqiǵa "Talǵar-Nuráli" jaýapkershiligi shekteýli seriktestiginiń "Búldirshin" balabaqshasynda bolǵan.
"Balabaqsha qyzmetkerleriniń aitýynsha, 26 qarasha saǵat 15.20 shamasynda bala túski uiqydan oianbaǵan. Olar jedel járdem shaqyryp, qyzdyń ata-anasyna habaryn bergen", - deidi ákimdiktegiler.
Balabaqshaǵa dereý dárigerler brigadasy jetken.
"Aldyn ala málimet boiynsha balanyń tamaǵynan qatty zat tabylǵan. Qylmystyq is qozǵaldy, tergeý júrip jatyr", - dep jazylǵan habarlamada.
Oqiǵa ornyna aýdan ákiminiń orynbasary men bilim bóliminiń jetekshisi barady.
Ákimdiktiń málimetine súiensek, "Búldirshin" balabaqshasy 2015 jyldan beri jumys isteidi. Kóz jumǵan qyz ótken jyldyń 8 qarashasynan balabaqshaǵa baryp júrgen.
Buǵan deiin Almaty oblysynyń politsiia departamenti 26 qarashada Talǵar qalasyndaǵy balabaqshalardyń birinde kishkentai qyzdyń kóz jumǵanyn habarlady. Atalǵan fakti boiynsha qylmystyq is qozǵalǵan.
"Sot-meditsinalyq saraptama kezinde qyzdyń tamaǵynan qatty plastmassa zat tabyldy. "Balalardyń ómiri men densaýlyǵy qaýipsizdigin qamtamasyz etý jónindegi mindetterdi tiisti deńgeide oryndamaý" baby boiynsha sotqa deiingi tergeý júrgizilip jatyr", - dep túsindirdi politseiler.
Balanyń ólimine kináliler bes jylǵa bas bostandyǵynan shektelýi nemese aiyrylýy múmkin.
