Nur-Sultan qalasynda Qazaqstan Dintanýshylarynyń HI forýmy ótip jatyr. Forýmda sóz alǵan Qazaqstan musylmandary Dini basqarmasynyń tóraǵasy, Bas múfti Serikbai qajy Oraz imamdardyń tynymsyz qyzmetin eskerip, olarǵa áleýmettik turǵydan qoldaý kórsetý týraly usynys aitty, – dep habarlaidy «Ult aqparat».
«Osy rette birneshe usynysty ortaǵa salaiyn: birinshiden, «Tarih jáne dini sana» jobasyn birlesip, júzege asyrýdy usynamyn. Tarihi nysandar men oryndarǵa jasalatyn josparly sapar jamaǵattyń tanymyn, kókjiegin keńeitip, intellektýaldyq deńgeiin arttyrady. Bul rette syrtqy elderdiń de tájiribesin de alýǵa bolady. Ekinshiden, qoǵamnyń aǵartýshy tobyna jatatyn imamdardyń tynymsyz qyzmetin eskerip, olarǵa da áleýmettik turǵydan qoldaý jasalsa degen usynysymyz bar. Ásirese, 100-ge jýyq elimizdegi túzeý mekemelerinde jumys jasaityn din qyzmetkerlerine turaqty jalaqy taǵaiyndalsa deimiz. Bul din qyzmetkerine kórsetilgen qurmet pen ádil baǵa bolar edi» dedi Bas múfti.
Bas múfti sonymen qatar, Aqsaqaldar institýtynyń rólin kúsheitý máselesin kóterdi.
«Óitkeni, biz qariianyń sózine qarsy shyqpaǵan halyqpyz. Bul sanaǵa sińgen saltymyz. «Qoi» deitin qoja bola bilgen qanshama qariialarymyz jat aǵymǵa ketken jastarǵa nasihatyn aityp, tárbiesin túzep keledi. Osy baǵytta oblystyq meshit janyndaǵy Aqsaqaldar alqasy men aýdan, aýyldardaǵy Biler keńesi úlken qural bola alady dep oilaimyn» dedi ol.
