Túrkiianyń Alaniia qalasyndaǵy saiabaqqa qazaqtyń uly aqyny ári oishyly Abai Qunanbaiulynyń esimi berilip, eskertkishi boi kóterdi, dep habarlaidy QR SIM baspasóz qyzmeti.
Abaidyń 175 jyldyǵyna orailastyrylǵan shara QR Túrkiiadaǵy Elshiligi, QR Antaliia Konsýldyǵy, Alaniia mýnitsipaliteti men Alaniiadaǵy qazaqstandyqtar qaýymdastyǵynyń uiytqy bolýymen ótti.
Saltanatty rásimge QR Túrkiiadaǵy Elshisi Abzal Saparbekuly, Alaniia mýnitsipaliteti basshysy Adem Mýrat Iýjel, QR Antaliiadaǵy konsýly Máýlen Ybyraikulov, Qazaqstannyń Alaniiadaǵy qurmetti konsýly Ahmet Djebeji, qala turǵyndary men qonaqtary qatysty.
Sharanyń shymyldyǵyn túrgen Elshi Abaidyń 175 jyldyǵyna demeý bolyp, saiabaqtyń ashylýyna qoldaý kórsetken Túrkiia eline alǵysyn bildirip, osy tekti sharalardyń eki el arasyndaǵy bailanystardy odan ári nyǵaiýyna septigin tigizetine senim bildirdi.
«Rýhaniiatymyzdyń temirqazyǵy, ulttyq bolmysymyzdyń ainasy sanalatyn uly oishyl murasynyń baýyrlas Túrkiiada erekshe dáriptelip jatqany – biz úshin úlken qýanysh» dedi Elshi. Memleket basshysy Qasym – Jomart Kemeluly Toqaev «Abai jáne HHI ǵasyrdaǵy Qazaqstan» atty maqalasyndaǵy «Qazir aityp júrgen intellektýaldy ult qalyptastyrý ideiasy Abaidan bastaý aldy deýge bolady. Uly oishyl ár sózimen ulttyń óresin ósirýdi kózdedi», – degen sózderine toqtala kele, «Abai atamyzdyń artynan qaldyrǵan ósiet – ónegesin túsinip, uǵyna alsaq, halqymyzdyń jáne jalpy adamzattyń órkendeýi jolynda ólsheýsiz úles qosatynymyz sózsiz» dep qosty.
Óz kezeginde, júrekjardy tilekterin bildirgen Alaniia mýnitsipaliteti basshysy Adem Mýrat Iýjel, «qala ortalyǵyndaǵy saiabaqqa Abai Qunanbaiulynyń esimin berilýi – qazaq jáne túrik halyqtarynyń rýhani ári mádeni jaqyndyǵynyń kezekti dáleli» dei kele, qazaqtyń uly oishylynyń esimi Alaniia tarihynda máńgi saqtalatynyna nazar aýdardy.
Al, QR Qurmetti konsýly Ahmet Djebeji Alaniia turǵyndary men qonaqtary saiabaq arqyly Abaidy tanýyna túrtki bolatynyna zor senimin jetkizdi.
Shara Antaliia, Alaniia qalalarynda ómir súretin otandastarymyzdyń uiymdastyrǵan kontserttik baǵdarlamasymen jalǵasty. Gúlnur Ermanova men balalar horynyń oryndaýynda «Kózimniń qarasy», Nurlan Ótepovtyń oryndaýynda Abai Qunanabaevtyń «Segiz aiaq», Gúlnur Ermanovanyń jeke oryndaýynda «Aittym sálem, Qalamqas» ánderi shyrqalyp, aqynnyń óleńderi oqyldy. Myń buralǵan qazaq qyzdary «Qamajai» biin bilep, kórermenge tań qaldyrdy.
Aita ketken jón, Alaniia saiabaǵynda boi kótergen aqyn eskertkishiniń avtory – Nurlan Ahmetov. Atalmysh shara, 2020 jylǵa josparlanǵan. Degenmen, COVID-19 pandemiiasy saldarynan keiinge shegerilgen bolatyn.
Buǵan deiin Antaliianyń Mýratpasha aýdanynda da Abai saiabaǵy ashylǵan bolatyn.
Abai atyndaǵy saiabaqtyń ashylýymen Túrkiianyń Syrtqy ister ministri Mevliýt Chavýshoglý, Ishki ister ministri Cúleimen Soilý, Ulttyq qozǵalys partiiasy tóraǵasy Devlet Bahcheli jáne birqatar ózge de laýazymdy tulǵalardan quttyqtaý jedel hattary kelip túsken.
