QR Parlamenti Májilisiniń jalpy otyrysynda «Qazaqstan Úkimeti men Túrkiia Úkimeti arasyndaǵy áskeri yntymaqtastyq týraly kelisimdi ratifikatsiialaý týraly» zań jobasy maquldandy, dep habarlaidy QazAqparat.
Kelisimge 2018 jylǵy qyrkúiekte Ankarada qol qoiyldy.
«Túrkiia Qazaqstannyń mańyzdy ári negizgi strategiialyq seriktesteriniń biri bolyp sanalady. Osy ýaqytqa deiin eki memleket arasyndaǵy áskeri saladaǵy yntymaqtastyq 1993 jylǵy 8 tamyzdaǵy áskeri bilim salasyndaǵy, sondai-aq 1994 jylǵy 23 aqpandaǵy áskeri ǵylym, tehnika jáne bilim salasyndaǵy yntymaqtastyq týraly kelisimder negizinde júzege asyrylyp keledi. Joǵaryda atalǵan halyqaralyq sharttardyń keibir erejeleri eki memlekettiń qoldanystaǵy zańnamasyna sáikes kelmeýi jáne olarda is-sharalardy ótkizý boiynsha qarjylyq shyǵystarmen qamtamasyz etý tártibiniń bolmaýyna bailanysty áskeri yntymaqtastyq salasynda jańa kelisim jasaý týraly sheshim qabyldanǵan bolatyn», - dedi QR Qorǵanys ministriniń orynbasary Timýr Dándibaev.
Onyń sózine qaraǵanda, qarastyrylyp otyrǵan kelisimniń maqsaty taraptar arasyndaǵy teń quqyqtyq pen ózara tiimdilik qaǵidattar negizinde áskeri yntymaqtastyqty damytýǵa negizdelgen.
«Kelisim áskeri daiarlyq pen oqytýdy qosa alǵanda, budan buryn qamtylmaǵan birlesken oqý-jattyǵýlardy ótkizý, áýe keńistigi arqyly áskeri múliktiń tranziti, meditsinalyq kómek kórsetý, zań quzyrettiligi, sondai- aq basqa da máselelerdi kózdeidi. Osy qujatty iske asyrý boiynsha sharalar taraptarmen birlesip ázirlegen Jyldyq yntymaqtastyq josparyna sáikes júzege asyrylatyn bolady. Kelisimdi iske asyrý Qazaqstannyń áskeri saladaǵy múmkindikterin keńeitýdi qamtamasyz etedi jáne eki memleket arasyndaǵy áskeri yntymaqtastyqtyń damýyna oń áser etetin bolady», - dedi T. Dándibaev.
