Túrkiiadaǵy jer silkinisine bailanysty Qazaqstannyń Túrkiiadaǵy elshiligi málimdeme jasady, dep habarlaidy "Ult aqparat".
Bul jaiynda Qazaqstan Respýblikasynyń Túrkiiadaǵy elshisi Abzal Saparbekuly Facebook paraqshasynda jazdy.
«Óte shuǵyl! Óte mańyzdy! 30 qazanda jergilikti ýaqyt boiynsha saǵat 14.51 shamasynda epitsentri Izmir provintsiiasynyń Seferihisar aýdanyna jaqyn jerde, Egei teńizinde 6.6 balldyq (kei aqparat kózderine sáikes, 6,8 nemese 7 balldyq) qýatty jer silkinisi boldy. Zilzala Túrkiianyń Egei jáne Marmara teńizderiniń jaǵalaýynda ornalasqan provintsiialarda sezildi. QR Elshiligi tiisti túrik memlekettik organdary jáne mekemelerimen bailanys ornatyp, mán-jaidy anyqtap jatyr» dep jazdy elshi.
Onyń aitýynsha, ázirge zardap shekken Qazaqstan azamattary týraly aqparat joq.
«Kómek qajet bolsa, azamattarymyz tikelei elshilikke +903124919100 nómirine nemese maǵan habarlasa alady» dep atap ótti Abzal Saparbekuly.
Eske sala keteiik, búgin Túrkiianyń batysynda jer silkingenin jazǵan bolatynbyz.
