Túrkiia "Talibanǵa" (Qazaqstanda tyiym salynǵan) Aýǵanstandaǵy gýmanitarlyq daǵdarysty eńserýge qol ushyn berýge ázir, biraq "Taliban" biligin moiyndamaidy. 14 qazanda Túrkiia syrtqy ister ministri Mevlýt Shavýshoglý tálipter úkimetindegi syrtqy ister ministri mindetin atqaratyn Ámir Han Mýttaqidi qabyldanǵannan keiin osylai dep málimdedi.
Shavýshoglýdyń aitýynsha, "Talibanmen" kelissóz júrgizý onyń biligin moiyndaýdy bildirmeidi.
"Aýǵanstan ekonomikasy kúiremeýi tiis. Sol sebepti Aýǵanstan aktivterin buǵattaǵan elder máselege túsinistikpen qarap, jalaqylardyń ýaqytynda tólenýine jaǵdai jasaý kerek" dedi ol.
Tamyz aiynyń ortasynda halyqaralyq kúshter qoldaǵan aýǵan úkimetin bilikten tyqsyryp, qyrkúiekte jańa úkimet jasaqtaǵan tálipter ózin halyqaralyq qaýymdastyqtyń moiyndaǵanyn qalaidy.
Birqatar kómekten qaǵylǵan el ekonomikasy kúireýge shaq tur, elde azyq-túlik baǵasy sharyqtap, jumyssyzdyq kóbeigen.
Mýttaqi Ankaraǵa saparynyń aldynda Katarda AQSh jáne Eýropa diplomattarymen kezdesken. Ol "Talibanǵa" qoiylǵan batys shekteýleri Aýǵanstandaǵy qaýipsizdikke qater tóndirip tur dep málimdegen.
Mýttaqi Túrkiiada Aýǵanstan aktivterin buǵattaǵan elder memleket ekonomikasynyń jaǵdaiyn onan saiyn álsiretip jiberdi, sonyń saldarynan Aýǵanstannan bosqyndar legi ulǵaiýy múmkin dedi.
