Túrkiia Respýblikasynyń Syrtqy ister ministri Mevliýt Chavýshoglýdyń shaqyrýymen Qazaqstan Respýblikasy Premer-Ministriniń orynbasary – Syrtqy ister ministri Muhtar Tileýberdi resmi saparmen Ankaraǵa keldi. Bul týraly QR SIM habarlady.
Sapar barysynda M.Tileýberdini Túrkiia Prezidenti Rejep Taiyp Erdoǵan qabyldady. Ministr Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń aǵymdaǵy jylǵy 31 naýryzda Túrkistan qalasynda ótetin Túrkitildes memleketter yntymaqtastyǵy keńesiniń beiresmi sammitine shaqyrýdy tapsyrdy. Sondai-aq, Túrkiia basshysyna Qazaqstan Prezidenti Qasym-Jomart Toqaevtyń jeke joldaýy tabys etildi.
Ankaraǵa sapary aiasynda eki eldiń syrtqy saiasi vedomstvolary basshylarynyń tóraǵalyǵymen Birlesken strategiialyq josparlaý tobynyń 6-shy otyrysy ótti. Is-shara barysynda taraptar ekijaqty qarym-qatynastardyń kún tártibindegi basym máselelerdi talqylady. Atap aitqanda, taraptar saiasi, saýda-ekonomikalyq, kólik-logistikalyq jáne mádeni-gýmanitarlyq yntymaqtastyqty odan ári damytý joldaryn qarastyrdy.
M.Tileýberdi óz sózinde Túrkiia Eýraziia qurlyǵyndaǵy Qazaqstannyń mańyzdy, strategiialyq jáne senimdi seriktesi bolyp tabylatynyn atap ótti. «Qazaqstan men Túrkiia arasyndaǵy ekijaqty yntymaqtastyqtyń turaqty joǵary deńgeiin qanaǵattanýshylyqpen atap ótemiz. Baýyrlas halyqtarymyzdyń arasyndaǵy myzǵymas dostyq pen joǵary deńgeidegi saiasi dialog bizdiń ózara tiimdi strategiialyq áriptestigimizdi tereńdetýge tolyq múmkindik beredi», - dedi Qazaqstan SIM basshysy.
M.Chavýshoglý, óz kezeginde, Qazaqstan-Túrkiia yntymaqtastyǵynyń berik negizi myqty ekonomikalyq bailanystar bolyp tabylatynyn jáne olardy qolda bar barlyq áleýetti paidalanyp, nyǵaitý qajet ekenin atap ótti. Sondai-aq, túrik ministri Qazaqstan «barlyq túrikterdiń tarihi otany» ekenin jáne Túrkiia bizdiń halyqtarymyzdyń arasyndaǵy rýhani bailanystarǵa úlken mán beretinin atap ótti.
Taraptar Qazaqstan men Túrkiia arasyndaǵy yntymaqtastyqtyń damý qarqynyna tereń qanaǵattanýshylyq bildirip, ekijaqty jáne kópjaqty formattaǵy áriptestikti odan ári nyǵaitýǵa ózara umtylysty atap ótti. Nur-Sultan men Ankaranyń óńirlik jáne jahandyq saiasattaǵy róli, sondai-aq túrki álemindegi eki eldiń bedeli arta túskeni atap ótildi.
Biyl elimiz Táýelsizdiktiń 30 jyldyǵyn atap ótýde jáne Túrkiia halyqaralyq arenada bizdiń táýelsizdigimizdi alǵashqylardyń biri bolyp tanydy. Kelesi jyly Qazaqstan men Túrkiia diplomatiialyq qatynastardyń ornaǵanyna 30 jyl tolýyn atap ótedi. Osy jyldar ishinde elder arasyndaǵy ekijaqty yntymaqtastyq strategiialyq áriptestik deńgeiine jetti. Qazaqstan men Túrkiia ekijaqty, óńirlik jáne halyqaralyq alańdarda tyǵyz ózara is-qimyl jasasýda.
Saýda-ekonomikalyq jáne investitsiialyq salalardaǵy ózara tabysty is-qimyl erekshe atap ótildi. Koronavirýstyq pandemiiaǵa qaramastan, eki jaqty taýar ainalymy 3 mlrd AQSh dollarynan asty jáne taraptar bul kórsetkishti 10 mlrd AQSh dollaryna deiin jetkizýge nietti.
Kezdesý sońynda Qazaqstan men Túrkiia SIM basshylary dialogty jalǵastyrýǵa jáne ekijaqty qatynastardyń barlyq máselelerin strategiialyq áriptestik negizinde dáiekti túrde sheshýge niet bildirdi.
Sol kúni Qazaqstan SIM basshysy Túrkiia Vitse-prezidenti Fýat Oktaimen kezdesý ótkizdi. Taraptar QR Premer-Ministri A.Mamin men F.Oktaidyń ózi teń tóraǵalary bolyp tabylatyn Úkimetaralyq komissiianyń kezekti 12-otyrysyna daiyndyqty talqylady.
