Túrkiia men Eýropadaǵy qandastardan kelgen gýmanitarlyq kómek aýrýhanalarǵa taratylyp jatyr, dep habarlaidy "Ult aqparat" «Otandastar» qoryna silteme jasap.
Aita keteiik, 14 shilde kúni Nur-Sultan ýaqytymen saǵat 02:30-da Túrkiia men Eýropadaǵy qandastar birigip uiymdastyrǵan gýmanitarlyq kómek Qazaqstanǵa kelip jetken bolatyn.
Kómektiń jalpy salmaǵy – 900 killogramǵa jýyq. Onyń ishinde meditsinalyq zattar (betperde, termometr, qorǵanysh kostiýmderi jáne basqalar) jáne ókpeni jasandy jeldetý qurylǵylary bar. Bul meditsinalyq jabdyqtar elimizdegi meditsina ortalyqtaryna úlestiriledi.
Júktiń bir bóligin búgin «Dúniejúzi qazaqtarynyń qaýymdastyǵy», «Otandastar kory» jáne elimizge Túrkiiadan arnaiy kelgen qazaq diasporasynyń ókilderi Nur-Sultan qalasyndaǵy juqpaly aýrýlar ortalyǵyna tapsyrdy. Gýmanitarlyq kómektiń qalǵan bóligi Almaty, Shymkent jáne ShQO emhanalaryna jetkiziledi.
«Álemniń qai tusynda júrse de, atajurt Otanyn umytpai, qiyn-qystaý ýaqytta elimizge qol ushyn sozyp, birden kómek kórsetken Túrkiiadaǵy, Eýropadaǵy qandastarymyzǵa, aǵaiyn-baýyrlarymyzǵa jáne osy júkti jetkizýge atsalysqan barlyq memlekettik mekemelerge alǵys aitamyz. «Dúniejúzi qazaqtarynyń qaýymdastyǵy» men «Otandastar kory» atynan rizashylyǵymyzdy jetkizemiz», - dedi jýrnalisterge suhbat bergen «Otandastar qory» KEAQ vitse-prezidenti Maǵaýiia Sarbasov.
