Túrkiia Siriiada qolǵa túsken, "Islam memleketi" terror uiymynyń múshesi bolýy múmkin shetel azamattaryn deportatsiialaýǵa kiristi.
Túrkiia syrtqy ister ministrligi AQSh azamatynyń deportatsiialanǵanyn, 14 qarashada Germaniianyń jeti azamatyn deportatsiialaitynyn habarlady. Frantsiianyń 11 azamaty men Irlandiia jáne Daniia azamattaryn deportatsiialaýǵa daiyndyq júrip jatyr. Olar qai eldiń azamaty bolsa, sol elge deportatsiialanady. Eýropa memleketteriniń reaktsiiasy ázirge belgisiz.
Túrkiia Prezidenti Rejep Erdoǵan Siriianyń soltústiginde taiaýda Túrkiia áskeri júrgizgen operatsiia barysynda "Islam memleketi" terror uiymyna qatysqan 300-ge jýyq shetel azamaty qolǵa túskenin habarlaǵan bolatyn.
Munan ózge, sheteldiń ekstremistik uiymǵa qatysy bar myńnan astam azamaty Túrkiia túrmesinde otyr. Erdoǵan Siriiadaǵy terror uiymǵa qosylǵan, urys kezinde qolǵa túsip, tutqynda otyrǵan azamattarynyń taǵdyryna nemquraidy qaraidy dep Eýropa memleketterin birneshe ret synaǵan. AQSh prezidenti Donald Tramp ta Eýropa memleketterin qazir kúrdter kúzetindegi lagerlerde otyrǵan azamattaryn qaitaryp alýǵa shaqyrǵan. Keibir aqparattarǵa qaraǵanda, Túrkiia Siriianyń soltústiginde áskeri operatsiia júrgizgen kezde kúrdter qolyndaǵy júzdegen sodyr qamaýdan qashyp shyqqan.
Britaniiadan bastap birqatar Eýropa elderi Siriia men Iraktaǵy radikal dinshilderge qosylǵan azamattaryn azamattyǵynan aiyrǵan edi. Túrkiia bul adamdardy da deportatsiialaǵysy keledi, biraq olardy azamattyǵynan aiyrǵan elder qabyldai ma, joq pa belgisiz.
Siriiada qarýly qaqtyǵys bastalǵaly Qazaqstannyń da segiz júzge jýyq azamaty Siriia men Irak aýmaǵyna ketkeni belgili bolǵan. Qazaqstan 2019 jyldyń basynan beri "Jýsan" operatsiiasy arqyly Siriia aýmaǵyndaǵy azamattaryn qaitara bastady. Arnaýly operatsiia boiynsha kelgenderdiń kópshiligi áielder men balalar.
