Túrkitildes memleketterdiń múftiler alqasy rýhani-dini konsýltativtik-keńesshi organ retinde birqatar bastamalarǵa muryndyq bola alady. Bul týraly QMDB tóraǵasy Naýryzbai qajy Taǵanuly Túrkistan qalasynda ótip jatqan «Múftiler alqasynda» málim etti, dep habarlaidy QazAqparat.
«Túrkitildes memleketterdiń múftiler alqasy rýhani-dini konsýltativtik-keńesshi organ retinde birqatar bastamalarǵa muryndyq bola alady. Birinshiden, memleketterimiz arasyndaǵy yntymaqtastyqty arttyrýǵa úles qosý. Islam qundylyqtary men rýhaniiatyn dáriptei otyryp, túrki halyqtarynyń dinaralyq bailanysyn arttyrý mańyzdy. Túrkitildes elder arasyndaǵy dini-etnikalyq negizde týyndaityn shielenisti kelissóz arqyly retteýge bar kúsh-jigerimizdi jumsaýymyz tiis. Alqaǵa múshe elder arasynda shieleniske jol bermeý, kerisinshe dini, rýhani jaǵdaidy jetildirý din men memleket qatynasyn laiyqty damytýǵa sep bolary anyq. Ekinshiden, túrli bólinýshilikterge jol bermeý. Atap aitqanda, násildik, dini, etnikalyq bólinýshilikterge jol bermei, saiasi ideologiialyq arandatýshylyqqa qarsy turýymyz qajet. Qazirgi tańda dástúrli túrki-Islam dúnietanymy qundylyqtaryn burmalaý, túrki halyqtary jáne musylmandar týraly jalǵan pikirler men kózqarastar qalyptastyrý jaǵdailary kezdesedi. Biz buǵan qarsy turýymyz kerek. Mundai keri áreketterdi dálelmen áshkerelep, ortaq sheshimder qabyldaǵanymyz abzal», - dedi Bas múfti.
Sondai-aq, Naýryzbai qajy Taǵanuly túrkitildes memleketterdiń múftiler alqasy aiasynda birigý mańyzdylyǵyn aityp ótti.
«Alqany qurýdaǵy maqsat – túrkitildes halyqtardyń yntymaqtastyǵy men baýyrlastyǵyn odan ári nyǵaitý. Sondai-aq, túrki dúniesiniń tarihi, rýhani jáne mádeni murasyn saqtaý baǵytynda qabyldanǵan sheshimder men bastamalardy iske asyrýdy jan-jaqty qoldaý. Bizdiń, túrki halyqtarynyń, nanym-senimi, tildik negizi, salt-dástúri, tipti tarihymyz ben rýhaniiatymyz da ortaq. Sebebi, babalarymyz tutas adamzatty ǵylym-bilim arqyly órkenietke bastaǵan kemeńger tulǵalar bolatyn. Túrki jurtynan shyqqan ál-Farabi, Ibn Sina, Birýni, Buhari, Matýridi, Iasaýi sekildi ǵulama babalarymyz bilimniń shyraǵyn jaǵyp qana qoimai, Islam órkenietinen óziniń laiyqty ornyn belgiledi. Sonyń arqasynda túrki-Islam mádenieti men órkenieti aitarlyqtai damyp, túrkilik renessans dáýiri qalyptasty», - dedi QMDB tóraǵasy.
Ol Túrkistan tórinde jinalý túrkitildes elderdiń ǵasyrdan ǵasyrǵa jalǵasyp kele jatqan bailanysyn nyǵaityp, tarihi-rýhani sabaqtastyq jibin jalǵaitynyna senimdilik bildirdi.
«Shynynda, qazirgidei qym-qýyt ýaqytta barshamyzdyń din nasihatynda ortaq bolýymyz mańyzdy. Sebebi, Islam ǵalymdary «Baýyrmaldyq – iman keltirgenderdiń ózara súiispenshiligi men din nasihatynda ortaq bolýy» degen. Sondyqtan, búgingi basqosýymyz bizdiń, túrki memleketteri bas múftileriniń baýyrmashyldyq bailanysyn jandandyra túsedi degen senimdemin. Alla yntymaqtastyǵymyzdy arttyryp, asyl dinimizdiń aibynyn asyrý úshin birlesip qyzmet etýdi barshamyzǵa násip etsin! Tamyry bir, tarihy ortaq elderimizdiń aýyzbirshiligi arta bersin!» - dedi Naýryzbai qajy Taǵanuly.
