Biylǵy jyl - el eńsesin biiktetken, tuǵyryn tiktegen Ońtústik jurty úshin tabysty da sátti jyl retinde tarih tórinde altyn árippen jazylary aidan anyq. Óitkeni osy jyly - Ońtústik Qazaqstan oblysy ortalyǵyn Túrkistan qalasyna kóshirip, Túrkistan oblys ortalyǵy bolyp jariialandy. Bul halyqtyń kópten kútken armany edi.
Elbasy Nursultan Ábishuly Nazarbaev: «Túrkistan - qazaq halqynyń ulttyq memlekettigin dúniege ákelgen altyn besik ári ony kemeldendirgen ónegeli mektep»,- dep aitqan bolatyn. Sondyqtan, biz úshin bul jyl rýhani jańǵyrýǵa bet buryp, tarihi serpilis jasaǵan qutty jyl boldy. Túrkistannyń túlegenine kýá bolǵan búgingi urpaq baqytty.
Tórt qaqpaly toǵyz joldyń torabynda kók kúmbezi alystan kóringen kóne shahardyń týristik áleýeti keremet. Álemge áigili jádigerimiz - Qoja Ahmet Iasaýi kesenesi - bizdiń maqtanyshymyz. Túrkistandaǵy árbir tóbe men qyrqanyń attary tunyp turǵan tarih. Qazaqtyń han, bi, sultan, batyrlary, igi jaqsylarynyń izi qalǵan, kóne mádeni muraǵa bai kieli jer. Eski Saýran qalashyǵy, Úkasha ata beiiti, Gaýhar ana jáne Álqoja ata keseneleri de tarihi qundylyǵymyz, týrister men ziiaratshylardyń qyzyǵýshylyǵyn arttyryp keledi. Alty ǵasyr ótkenmen myńdaǵan jyldar tarihyn boiyna jinap, óz shýaǵyn adam rýhyn joǵary kóterer qasietimen nur etip shashyp kele jatqan qundy muramyz - Taiqazan kóptegen týristerdiń nazaryn ózine aýdartady. Túrkistanǵa «Taiaq ustap kelgenge tai mingizgen» yrys aldy yntymaq pen Iasaýidiń shapaǵaty ǵoi. Kesenege ziiarat etip keletin, sáýletine tamsanyp jetetin týristerdiń sany jyl ótken saiyn artýda.
Uly Jibek jolyndaǵy Túrkistanda qalaǵa kelgen qonaqtarǵa mádeni kópshilik qyzmet túrleri joǵary deńgeide kórsetilip keledi. Osyǵan orai oblys ákimdigimen bekitilgen kestege sáikes, Túrkistan qalasynyń Esim han alańynda ár senbi, jeksenbi kúnderi aýdan, qala ónerpazdarynyń kontserttik baǵdarlamalaryn ótkizý josparlanǵan bolatyn. 23 qyrkúiek kúninen bastaý alǵan merekelik «Túrkistanǵa sálem!» kontsertinde oblystyń ár aýdan, qalalarynan kelgen ónerpazdar men qolóner sheberleriniń kórmeleri men óner shashýlary kórsetildi. Aldymen, Kentaý qalasy kontserttik baǵdarlama usynyp, qolóner sheberleri men sýretshilerdiń kórmelerin qoidy. Sonymen birge, Ordabasy aýdany eshqandai jarnama kórsetpegendikten kórermenmen az qamtyldy. Báidibek aýdanynyń kontserttik baǵdarlamasy joǵary deńgeide ótti. Kórermendermen qamtylǵan kontserttik baǵdarlamada qolóner sheberleriniń kórmeleri qoiylyp, kontsert sońy nur shashýmen aiaqtaldy.
Otyrar aýdany túrkistandyqtarǵa tamasha kóńil kúi syilap, qolóner sheberleri men sýretshilerdiń kórmesi qoiylyp, ulttyq sport túrinen jarystar uiymdastyrdy. Budan keiin Arys qalasynyń, Tólebi, Sairam, Qazyǵurt aýdandarynyń, sonymen birge Saryaǵash, Keles, Jetisai, Maqtaaral, Túlkibas, Sozaq aýdandary kórkemónerpazdarynyń kontserti ótkizilip, qolóner sheberleri men sýretshiler kórmeleri qoiyldy.
«Túrkistanǵa sálem!» kontserti qarasha aiynyń 24-ne óz máresine jetip, jańa oblys ortalyǵy Túrkistan qalasy ónerpazdarynyń «Túrkistanym - Turanym» atty merekelik kontserti men qolóner sheberleri jáne sýretshilerdiń kórmesi tamashalandy. Sonymen qatar, «Iassy» halyqtyq folklorlyq ansambli, «Tarlan» instrýmentaldy vokaldy ansambli, qalalyq mádeniet úiiniń ónerpazdary óner kórsetti.
Liza TÓLEGENQYZY,
qalalyq mádeniet úiiniń direktory
