Túrkistannyń jańa mártebesi qalaǵa investitsiia tartýǵa kómektesedi. Mundai pikirdi Nursultan Nazarbaevtyń qory janyndaǵy Álemdik ekonomika jáne saiasat institýtynyń sarapshysy Jumabek Sarabekov aitty, dep habarlaidy QazAqparat.
«31 naýryzda Túrki keńesiniń beiresmi sammiti ótti. Oǵan jeti túrki tildes memlekettiń kóshbasshylary qatysty. Túrkistanda ótedi dep josparlanǵanmen, epidemiologiialyq jaǵdaiǵa bailanysty is-shara onlain rejimde ótti. Soǵan qaramastan, is-shara mazmundy jáne túrki elderiniń seriktestigin damýdyń jańa kezeńine shyǵara alatyn mańyzdy málimdemeler men kelisimderge toly boldy. Keńeste qaralǵan ózekti máselelerdiń biri – Túrkistannyń túrki áleminiń rýhani astanasy retinde taný týraly deklaratsiiaǵa qatysty boldy. Kezdesý barysynda bul qujat biraýyzdan maquldandy. Bul is-shara Túrkistannyń jáne jalpy Ońtústik Qazaqstan oblysynyń damýyna oń áserin tigizetin qazaqstandyq diplomatiianyń jetistikterine jatqyzylýy kerek», - deidi Nursultan Nazarbaevtyń qory janyndaǵy Álemdik ekonomika jáne saiasat institýtynyń sarapshysy Jumabek Sarabekov.
Onyń aitýynsha, Túrkistannyń jańa mártebesi qalaǵa investitsiia tartýǵa kómektesedi. Qazaqstan Prezidenti Qasym-Jomart Toqaev samitte atap ótkendei, Túrkistannyń múmkindigi kóp jáne keń resýrstyq bazasy bar.
«Qazirgi ýaqytta oblys ortalyǵynda jalpy quny 1,4 mlrd dollardy quraityn aýqymdy infraqurylymdyq jobalar júzege asyrylýda. Túrkistannyń investitsiialyq áleýetin ilgeriletý arqyly jeke investorlardy, onyń ishinde sheteldik investorlardy kóbirek tartýǵa bolady. Buǵan Túrkistan aimaǵynda túrki elderin biriktiretin erkin ekonomikalyq aimaq qurý týraly Elbasy aitqan bastama da yqpal etedi. Qalanyń jańa mártebesi týristik áleýet úshin de keremet múmkindik. Túrkistannyń búkil túrki áleminiń qasietti ortalyǵy mártebesin alýy Keńes elderi men jalpy álem saiahatshylarynyń qyzyǵýshylyǵyn arttyra alady. Statistikaǵa súiensek, pandemiiaǵa deiingi kezeńde qalaǵa jylyna orta eseppen millionǵa jýyq týrist kelgen eken. Jergilikti ákimshiliktiń josparyna sáikes týrister legi 2025 jylǵa qarai 5 million adamǵa deiin ulǵaiýy kerek», - deidi sarapshy.
Sonymen birge, sarapshy atap ótkendei, Túrkistandy tutastai túrki áleminiń rýhani astanasy retinde tanýdy Qazaqstannyń túrki integratsiiasyn ilgeriletýdegi sińirgen eńbegin moiyndaý dep sanaýǵa bolady.
«Túrki elderiniń barlyq negizgi yntymaqtastyq qurylymdary, sonyń ishinde TÚRKSOI, TÚRKPA Assambleia keńesi, Túrki akademiiasy, sondai-aq Túrkitildes memleketterdiń yntymaqtastyq keńesiniń ózi Nursultan Nazarbaevtyń jeke bastamasy boiynsha quryldy. Túrki keńesiniń damýyna qosqan úlesine qurmet retinde 2019 jyly oǵan Túrkitildes memleketterdiń yntymaqtastyq keńesiniń ómir boiy qurmetti tóraǵasy bolý mártebesi berildi. Qazaqstan Túrkitildes memleketterdiń yntymaqtastyq keńesin odan ári nyǵaitýǵa jáne damytýǵa múddeli. Túrki integratsiiasy bizdiń egemendigimizdi nyǵaitady jáne Qazaqstannyń syrtqy saiasatyndaǵy negizgi baǵyttardyń biri bolyp sanalady. Túrki keńesiniń arqasynda biz túrki elderimen júieli jáne kópjaqty negizde jumys isteýge múmkindik alamyz», - deidi ol.
Sarapshynyń aitýynsha, ótken onjyldyqty uiymnyń belsendi qalyptasý kezeńi dep sanaýǵa bolady.
«Qazir Keńes óziniń damýynda jańa kezeńge jaqyndady. Bul, eń aldymen, Keńesti túrki memleketteriniń tolyqqandy uiymyna ainaldyrý mindetimen bailanysty. Osy turǵyda osy ideianyń avtory bolyp sanalatyn Qazaqstannyń Tuńǵysh Prezidentiniń sammitindegi sózin atap ótý kerek. Ol óz sózinde Qazaqstan seriktesteriKeńes jumysynyń deńgeiin tolyqqandy halyqaralyq uiymǵa kóterý bastamasyn qoldaitynyn málimdedi. Tiisti ereje Túrkistan deklaratsiiasynda jazylǵan. Osylaisha, jaqyn arada Túrkitildes memleketterdiń yntymaqtastyq keńesi Túrki memleketteri uiymyna qaita tirkeledi», - deidi ol.
