Búgin Túrkistan qalasyna Ózbekstannan úsh júk kóligine tielgen gýmanitarlyq kómek keldi. Ózbekstan Respýblikasynyń Prezidenti Sh.Mirziioevtiń tapsyrmasy aiasynda jiberilgen kerýendi Túrkistan oblysy ákiminiń orynbasary Sáken Qalqamanov bastaǵan top qarsy aldy, dep habarlaidy "Ult aqparat".
Arnaiy sharaǵa qatysqan Ózbekstannyń Qazaqstandaǵy Tótenshe jáne ókiletti elshisi S.Niiazhodjaev syn saǵattarda baýyrlas elder bir-birine qoldaý bildirý qajettigin aitty. Onyń sózinshe, kómek kerýeninde 150 myń meditsinalyq betperde, 2500 qorǵanys kiimi, 150 myń meditsinalyq qolǵap, 1000 termometr jáne 440 kereýet bar. Kórshi elden kelgen kómekke oblys ákiminiń orynbasary Sáken Qalqamanov alǵys aityp, rizashylyǵyn bildirdi. Atalǵan kómek aldaǵy ýaqytta Túrkistan oblysynyń barlyq meditsinalyq mekemelerine úlestirilmek.
Aita keteiik, buǵan deiin sý tasqyny oryn alǵan Maqtaaral aýdanyna da Ózbekstannan kómek qoly jetken bolatyn. Kórshi eldiń azamattary eldimekenderde sý sorý jumystaryn júrgizip, aýmaqty kúl-qoqystardan tazartqan bolatyn.
