Túrkistandyq meditsina mamandary Túrkiia elinde tájiribe almasýǵa attanyp ketti. Ystanbul qalasyna biliktiligin arttyrýǵa ketkenderdiń arasynda jedel járdem stantsiiasynyń 10 dárigeri men feldsheri bar, dep habarlaidy "Ult aqparat".
Bul sharany oblystyq Qoǵamdyq densaýlyq basqarmasy uiymdastyrýda. Basty maqsat – meditsina mamandaryna sońǵy tehnologiialardy meńgerip, jedel túrde naýqastardy emdeýge daiarlaý bolyp otyr.
Aita keteiik, biliktiligin shyńdaý úshin ketken arnaiy top Túrkistan, Kentaý, Ordabasy stantsiialarynyń meditsinalyq qyzmetkerlerinen jasaqtalǵan. Olar osy eldegi kóptegen meditsina mekemelerinde bolyp, áriptesterimen tádiribe almaspaq. Jinaqtalǵan tájiribe óńirdegi jedel meditsinalyq járdemniń sapasyn arttyrýǵa múmkinshilik bermek. Basqarma tarapynan jyl sońyna deiin taǵy birneshe topty shet memleketterde oqytý josparlanyp otyr.
Jalpy, ótken jyly óńirdiń aýrýhanalary men emhanalarynda eńbek etetin 3 myńǵa jýyq meditsinalyq qyzmetker biliktiligin arttyrǵan.
