Turǵyn úilerge gaz jetkizý qyzmetin kórsetetin kompaniialar tehnikalyq jabdyqty durys paidalaný úshin de jeke jaýapty bolady. Bul týraly QR Tótenshe jaǵdailar ministri Iýrii Ilin aitty, dep habarlaidy QazAqparat.
«Túrkistan oblysyndaǵy qaiǵyly jaǵdaiǵa kelsek, mamandar bul úilerdi aralap shyqqan. Bizdiń qyzmetkerler turǵyndarǵa gaz-tehnikalyq jabdyqtyń qaýipsizdik erejeleri boiynsha nusqaýlyq ótkizgen. Atalǵan úi de esepte turǵan. Biraq mundai aralaý jumystary da otbasyn qaiǵyly oqiǵadan qutqara almady», - dedi ministr Ortalyq kommýnikatsiialar qyzmetinde ótken brifingte.
Ministr turǵyndardy órtke qarsy qaýipsizdik sharalaryn jáne gaz-tehnikalyq jabdyqtardy paidalaný talaptaryn qadaǵalaýǵa shaqyrdy.
«Gaz jetkizý boiynsha turǵyn úilerge tikelei qyzmet kórsetetin kompaniialar kelisimshartta jazylǵandai, tehnikalyq jabdyqtyń durys paidalanylýy úshin de jeke jaýapty bolady. Túrkistandaǵy jaǵdai boiynsha da kelisimshart jasalǵan kompaniia osy jabdyqqa tehnikalyq kýálandyrý júrgizýge jáne gaz-tehnikalyq jabdyqty durys paidalaný tujyrymdamasyn berýge mindetti bolǵan», - dep túsindirdi Iýrii Ilin.
Eske sala ketsek, 17 aqpanda Túrkistan oblysyndaǵy jeke turǵyn úide 5 adamnyń denesi tabyldy, onyń tórteýi kámeleketke tolmaǵan.
Tekserý barysynda 3 bólmeli úide kamin túrindegi pesh (Iran peshi) ornatylǵany jáne oǵan gofrlengen burǵysh qosylǵany anyqtaldy. Ol 1,5 metr qashyqtyqta qabyrǵadaǵy tesik arqyly kóshege shyǵarylǵan. Syrtqy jaǵynan gofrlengen rozetka 5-7 sm ǵana quraidy, osylaisha qatty jel peshtegi tartylystyń nasharlaýyna yqpal etip, ýly gaz bólme ishine taralǵan.
