Biyl Túrkistan oblysyndaǵy 961 mektepte 510 myńnan astam bala bilim alady. Al, 1-synypqa 54 570 oqýshy qabyldanady. Bul elimizdegi eń úlken kórsetkish, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Jańa oqý jylyna qarsy 5 jańa mektep paidalanýǵa beriledi. Jyl sońyna deiin taǵy 16 mekteptiń qurylysy aiaqtalady. Óńirde jekemenshik mektepter sany 56 –ǵa jetti. Oblys boiynsha úsh jylda 200 mektep salý josparlanǵan. Oblys biýdjeti men «Aýyl-El besigi» baǵdarlamasy aiasynda 32 mektepti kúrdeli jóndeýden ótkizý úshin 4 012,7 mln.teńge qaraldy.
Jańa oqý jylyna daiyndyq barysy Túrkistan oblysynyń ákimi Ómirzaq Shókeevtiń tóraǵalyǵymen ótken aptalyq apparat otyrysynda baiandaldy. Oblys ákimi bilim salasyna qatysty máselelerdiń basty nazarda ekenin eskertti. Balalardyń sapaly bilim alýy úshin barlyq jaǵdaidyń jasalýy - ákimniń jiti baqylaýynda.
Áleýmettik osal toptaǵy otbasy balalaryn mektep formasymen jáne mektep quraldarymen qamtamasyz etý úshin oblystyq biýdjetten 1, 9 mln. teńge qarjy bólindi. Qarjy 52 myńnan astam balanyń ata-analardyń esepshottaryna aýdarylady. Ár balaǵa 35 275 teńge belgilendi. Budan bólek, «Mektepke jol» respýblikalyq aktsiiasy 568 balaǵa jalpy 12,5 mln.tg demeýshiler tarapynan materialdyq kómek berilgen. Shara qyrkúiek aiynyń aiaǵyna deiin jalǵasady.
Oblystyq adami áleýetti damytý basqarmasynyń basshysy Dinislam Bolathanulynyń málimdeýinshe, orta bilim berý uiymdarynyń bilim sapasyn arttyrý maqsatynda tolyqqandy oqý protsesine qajetti barlyq fýnktsiialardyń jiyntyǵy bar biryńǵai integratsiialanǵan «Bilim Land» bilim berý onlain platformasymen «Áleýetti memlekettik jekeshelik áriptestikti iske asyrý máseleleri boiynsha yntymaqtastyq týraly Memorandým» túzildi. Memorandým aiasynda oblystaǵy orta bilim berý uiymdary «BilimLand» bilim berý platformasyna 100% tegin qosylyp, barlyq bilim berý resýrstary engizilýde.
Pán kabinetin jabdyqtaýǵa kúsh salyndy. 57 synyp fizika, himiia, biologiia, STEAM 6 bilim berý júiesi engizilip, jasaqtalady. 2022-2023 oqý jylyna qajetti oqýlyqtar satyp alýǵa oblystyq biýdjetten 5 mlrd.teńgeden astam qarjy bólingen. Onyń ishinde 378 mln.teńgege kórkem ádebiet satyp alý josparlanǵan.
Sonymen qatar mektep kitaphanalarynyń bazasyn esepke alý, mektepter arasyndaǵy kitap almasý, elektrondy túrde suranys berý júiesi boiynsha «E-Kitaphana» platformasy engizildi.
Óńirdegi 52 tehnikalyq jáne kásiptik orta bilim oshaqtaryndaǵy 26 myńǵa jýyq stýdent bilim alady. Kolledjder jelisin beiindendirý jumystary júrgizilip jatyr. Aldaǵy ýaqytta «Kasipkor» jobasy aiasynda qurylys jáne IT salalary boiynsha 2 (eki) kolledji ashý, kolledjderdiń qarjylyq derbestigin qamtamasyz etý
maqsatynda kezeń-kezeńimen memlekettik kolledjderdiń uiymdyq-quqyqtyq nysanyn aýystyrý jáne «Jas maman» jobasyn iske asyratyn 9 kolledj bazasynda quzyrettilik ortalyqtary men WorldSkills halyqaralyq standarttaryna sáikes jattyǵý lagerlerin ashý josparlanyp otyr.
Oblystaǵy 28 kolledj 314 kásiporynmen birlese 5122 stýdentti dýaldy oqytýmen qamtýda.
Túrkistan oblysynda ornalasqan 1400-den astam mektepke deiingi uiymdarynyń memlekettik tapsyrys berýi «Balabagsha.snation.kz» júiesine tirkelý arqyly iske asyrylýda. 1-6 jastaǵy 155 myńnan astam bala balabaqshaǵa barady. 3-6 jas aralyǵyndaǵy balalardy mektepke deiingi bilimmen qamtý kórsetkishi kórsetkishi 98,9 % quraidy.
