Túrkistanda jańa zaman talaptaryna sai jabdyqtalyp, 100 paiyz tsifrlyq júiege qosylǵan meditsinalyq jedel járdem ortalyǵy salyndy, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
«Qazaqstandyq-Frantsýzdyq «KATKO» birlesken kásiporny» JShS demeýshiligimen boi kótergen meditsinalyq stantsiia 25 brigadaǵa arnalǵan. Investitsiia kólemi – 1,4 mlrd teńge. Elimizdiń densaýlyq saqtaý ministri Ajar Ǵiniiat, oblys ákimi Ómirzaq Shókeev búgin ortalyqtyń jumysymen tanysty.
Zamanaýi úlgide jasaqtalǵan ortalyqta jedel járdem avtokólikteri shaqyrtýlarǵa der kezinde meditsinalyq kómek kórsetý úshin defibrilliator, kardiostimýliator, kardioversiia, kardiomonitor, elektrokardiograf, IVL apparattarymen, ottegimen jáne elektrlik, mehanikalyq sorǵysh apparattarymen qamtylǵan. Jedel járdem stantsiiasy jylyna 70 000 - ǵa jýyq shaqyrýǵa shyǵa alady.
«Túrkistan oblysynda meditsina salasynda istelip jatqan jumystar jetkilikti. Jańa nysandar salynyp, dárigerlerdiń biliktiligin arttyryp, tsifrlandyrý, jedel járdem kólikterimen qamtý jumystary óz retimen júrgizilip keledi. Bul, óz kezeginde, óńirimizdegi atalǵan salanyń odan ári damyp, órkendeýine jol ashady dep bilemin. Jańa jedel járdem stantsiiasyna investitsiia salǵan «Qazaqstandyq-Frantsýzdyq «KATKO» birlesken kásipornyna» rizashylyǵymyzdy bildiremiz. Túrkistanda halyqaralyq standarttarǵa sai zamanaýi emdeý ortalyqtary jumys isteitin bolady», – dedi Ómirzaq Shókeev.
Jedel járdem stansasy 4 kategoriialyq sanat boiynsha «altyn saǵat» qaǵidasyna sai jumys isteidi. Ortalyqta sondai-aq AQSh-ta biliktiligin arttyrǵan oblys mamandary qyzmet kórsetedi. Jalpy oblys boiynsha 140 jedel meditsinalyq járdem brigadalary shaqyrtýlarǵa qyzmet atqarady. Óńir qajettiligi 96 paiyzǵa qamtylǵan. Oblysta jedel járdem qyzmetiniń klasteri qurylyp, aýyldyq jáne qalalyq jedel járdem qyzmetteri ortalyqtandyrylǵan. Nátijesinde naýqastarǵa jetý ýaqyty barynsha azaiyp, qyzmet kórserý sapasy aitarlyqtai artty.
Túrkistan qalasynda meditsina salasyn damytýǵa kúsh salynýda. Birikken Arab Ámirlikteriniń qoldaýymen «Ana men bala ortalyǵynyń» qurylysy júrip jatyr.
