Búgin Qoja Ahmet Iasaýi atyndaǵy HQTÝ-diń jýrnalistika kafedrasynyń úsh úzdik stýdentine talantty jýrnalist Beisen Quranbek atyndaǵy stipendiia saltanatty túrde tabystaldy, dep habarlaidy Túrkistan oblysy ákiminiń baspasóz qyzmeti.
Stipendiiany Qazaqstan Jýrnalister odaǵynyń Túrkistan oblystyq filialynyń tóraǵasy, oblystyq máslihat depýtaty Ǵalymjan Elshibai tapsyrdy.
Sharaǵa Qoja Ahmet Iasaýi atyndaǵy HQTÝ-niń rektory Janar Temirbekova, elimizge tanymal telejýrnalist Ábdez Rahmanuly jáne bir top oblystyq máslihat depýttatary men BAQ ókilderi qatysty.
Is-sharada sóz alǵan oqý ornynyń jańa basshysy Janar Amangeldiqyzy ozat stýdentterge qoldaý bildirip, shabyt syilaǵan odaq tóraǵasyna shynaiy alǵysyn bildirdi. Sondai-aq ol aldaǵy ýaqytta oblystyq jýrnalister odaǵymen birge yntymaqtastyqta jumys isteýge múddeli ekenin jetkizdi.
Óz kezeginde sóz alǵan Qazaqstan Jýrnalister odaǵynyń Túrkistan oblystyq filialynyń tóraǵasy, oblystyq máslihat depýtaty Ǵalymjan Elshibai marqum Beisen Quranbek týraly keńinen sóz qozǵap, onyń qazaq jýrnalistikasyna qosqan úlesin tilge tiek etti.
«Talantty jýrnalist Beisen Quranbekpen bir grýppada bilim aldyq. Dos boldyq. Beisen eńbek jolyn sport gazetinen bastap, barlyq satylardan ótken óte tájiribeli naǵyz jýrnalist edi. Onyń qazaq jýrnalistikasyna qosqan úlesi orasan. Bir ǵana «Aitýǵa ońai», «Qaraket» syndy tok-shoýlary eldiń ystyq yqylasyna bólindi. Alaida Beisenniń ǵumyry tym qysqa boldy. Allanyń buiryǵy shyǵar. Endeshe búgingi Beisen atyndaǵy stependiiany ielenip otyrǵan ini-qaryndastarymyzǵa dosymyzdyń ǵumyryn emes, taǵdyryn emes, talantyn, eńbeksúigishtigin, adaldyǵyn bersin dep tileimiz», - dedi Ǵalymjan Qamytbekuly.
Shara barysynda Beisenniń áriptesteri men dostary estelikter aityp, stýdentterge aqyl-keńesterin berdi.
