Túrkistanda «Túrkistan - Túrki áleminiń besigi» atty túrki elder jastary men belsendileriniń Halyqaralyq sammitiniń plenarlyq otyrysy ótti. Elimizdiń Aqparat jáne qoǵamdyq damý ministrligi uiymdastyrǵan basqosýda «Túrkistan – Túrki áleminiń rýhani astanasy» ideiasyn ilgeriletý men mádeni týrizm, birlesken jastar lagerlerin uiymdastyrý men jastar uiymdarynyń yntymaqtastyǵy jáne t. b. baǵyttar boiynsha yntymaqtastyq máseleleri taqylandy, dep habarlaidy "Ult aqparat".
Qazaqstan Respýblikasy Táýelsizdiginiń 30 jyldyǵyna orailastyrylǵan Sammit onlain jáne oflain formatta ótip, oǵan 300-den astam adam qatysty. Jiynda túrkitildes halyqtarynyń ókilderi sóz sóilep, alqaly sharanyń mańyzdylyǵyn atap ótti.
Forýmǵa Qazaqstan Respýblikasy Parlamenti Senatynyń Tóraǵasy Máýlen Áshimbaev video-bailanys rejimi arqyly qatysyp, quttyqtaý sóz sóiledi.
Óz sózinde Máýlen Áshimbaev Túrkistannyń túrki áleminiń tarihynda róli erekshe ekenine nazar aýdardy. Ol kóne shahardyń qaita túleýi tutas túrki álemi úshin mańyzdy ekenin tilge tiek etip, mundai qadam ortaq tarihymyzdy saqtaýǵa jáne túrkitildes halyqtardyń qarym-qatynasyn odan ári nyǵaitýǵa yqpal etetin aitty. Senat Tóraǵasy Elbasynyń tarihi sheshimi men Memleket basshysynyń qalanyń damýyna erekshe kóńil bólýiniń arqasynda Túrkistan sońǵy jyldary zamanaýi, kórikti qalaǵa ainalǵanyn atap ótti.
«Qazirgi tańda kóne Túrkistannyń jańa beinesi qalyptasýda. Shahardyń osyndai jetistigi Qazaqstan Respýblikasynyń Tuńǵysh Prezidenti – Elbasy Nursultan Ábishuly Nazarbaevtyń jasampaz sheshiminiń nátijesi. Osydan úsh jyl buryn Elbasy Túrkistan oblysyn qurý týraly tarihi Jarlyqqa qol qoiǵan edi. Sodan bastap qalanyń ekinshi tynysy ashyldy. Túrkistandy damytý isine Qazaqstan Respýblikasynyń Prezidenti Qasym-Jomart Kemeluly Toqaev basa mán berip keledi. Kóktemde ótken Túrkitildes memleketter basshylarynyń sammitinde Túrkistannyń «Túrki áleminiń rýhani astanasy» bolyp jariialanýy sonyń jarqyn kórinisi», – dedi Máýlen Áshimbaev.
Jiynda Aqparat jáne qoǵamdyq damý ministri Aida Balaeva sóz sóilep, búginde túrkitildes elder arasyndaǵy qarym-qatynas belsendi damyp kele jatqanyn atap ótti. Osyndai aýqymdy jumystardyń aiasynda túrki memleketteriniń jastary arasyndaǵy yntymaqtastyqty nyǵaitý máselesi de basty nazarda ekenin jetkizdi.
«Búgingi jastarymyzdyń ózara yntymaqtastyǵy men dostyǵy, birikken bastamalary men jobalary – bizdiń memleketter arasyndaǵy bailanysty odan ary nyǵaitýdyń birden-bir kepili. Jastar saiasatyndaǵy yntymaqtastyqty tereń damytý qashanda basty nazarda. Bul maqsatta biz jaqynda Túrkiia memleketimen jastar saiasaty strategiialyq sessiiasyn ótkizgen bolatynbyz. Nátijesi mol jiynda eki elge ortaq ózekti máseleler qaralyp, jastardyń resýrstyq Ortalyǵy volonterlik qozǵalys, áleýmettik qoldaý salalarynda ózara tájiribe almasý jóninde kelisimge keldik. Osyndai strategiialyq sessiialardy qyzyǵýshylyq tanytqan barlyq túrki memleketterimen birlesip ótkizý aldaǵy josparda bar. Sonymen qatar, baýyrlas elderdiń jastaryna arnalǵan Iasaýi atyndaǵy 50 granttyń bólinýi – bilim berý salasyndaǵy áriptestikti jańa deńgeige kóterip, mádeni-aǵartýshylyq keńistikti keńeitýge tyń serpin beredi dep senemin. Bul oraida, biz túrki elderiniń jas ǵalymdaryn osy jáne basqa da ǵylymi jobalar aiasynda yntymaqtastyq ornatyp, birlese jumys atqarýǵa shaqyramyz. Bundai qadamdar – jas ǵalymdar arqyly ǵylymi bailanysty jańa deńgeige kóterip, ortaq tarihymyzdyń óz elderimizde keńinen nasiattaýǵa jol ashap edi»,- dedi Aida Balaeva.
Jiynda sonymen qatar TÚRKPA Bas hatshysy Altynbek Mamaiýsýpov pen Halyqaralyq túrki akademiiasynyń prezidenti Darhan Qydyráli jáne túrkitildes elderdiń birqatar belsendi jastary sóz sóiledi.
Aita keteiik, aǵymdaǵy jyldyń 31 naýryzynda Qazaqstan Respýblikasynyń Prezidenti Qasym-Jomart Toqaevtyń tóraǵalyǵymen ótken Túrki memleketteri yntymaqtastyq keńesiniń beiresmi sammitinde Túrkistan qalasy «Túrki áleminiń rýhani astanasy» dep jariialanǵan bolatyn. Sammit barysynda Qazaqstan Respýblikasynyń Tuńǵysh Prezidenti - Elbasy Nursultan Ábishuly Nazarbaev bul bastama Túrkitildes memleketter arasyndaǵy yntymaqtastyqqa qosymsha serpin beretinine senim bildirgen edi. Sondai-aq, Túrki keńesi qyzmetiniń maqsattarynyń biri túrki elderi jastarynyń yntymaqtastyǵy bolyp tabylady.
