«Túrkistan – Túrki áleminiń júregi» atty aýdan, qalalardyń mádeniet kúnderi aiasynda Sairam aýdanynyń rýhani-mádeni kerýeni oblys ortalyǵyna keldi, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Úsh kúndik baǵdarlamanyń alǵashqy kúni «Aqsý» folklorly halyqtyq ansambliniń, «Samuryq» bi tobynyń «Aqsýkentim – arailym» atty kontsertimen bastaý aldy. Sairam aýdany ákiminiń orynbasary Sh.Ýbaidýlaev, Oblystyq mádeniet basqarmasynyń Mádeni is-sharalardy uiymdastyrý bóliminiń basshysy M.Kenjetaiuly, atalmysh bólimniń bas mamany E.Sartaev bastaǵan qonaqtar aldymen qolóner jáne kitap kórmesin, aýylsharýashylyq jármeńkesin tamashalady. Sodan soń sporttyq is-sharalarmen jalǵasyp, jas sportshylar óner kórsetti.Júrgizýshiler ortaǵa shyǵyp, shara maqsatyn kópshilikke tanystyryp, kezekti qazaq kúilerine berdi. Sodan keiin saltanatty keshti ashyp berý úshin aýdan ákiminiń orynbasary Shuhrat Ýbaidýlaev sahnaǵa shyǵyp, quttyqtaý sóz sóiledi. Ári qarai Túrkistanǵa arnaý aitylyp, kúmis kómei ánshiler áýelete án salsa, myń buralǵan bishiler qazaq jáne ózge de ulttyq bi bilep, kórermen kóńilin kóterdi.
Kelesi kúni aqyn, sazger Roza Ábdijapparovannyń shyǵarmashylyǵynan «Kúzgi áýen» atty kitap kórmesi ázirlenip, kópshilikke tanystyryldy. Sodan soń «Aqsý áýenderi» halyqtyq vokaldy-instrýmentaldy ansambliniń qatysýymen «Kieli meken – Sairamym!» atty kontsertine ulasty. Al sharanyń sońǵy kúninde kelýshiler ulttyq salt-dástúr jáne qolóner kórmesin tamashalady. Ári qarai Ibragimovtar otbasylyq ansambli men «Ǵuncha» halyqtyq ansambliniń «Sairam – dostyq arnasy» atty kontserttik baǵdarlamasymen qorytyndylandy. Osylaisha Sairam aýdanynyń ónerpazdary Túrkistan jurtshylyǵyna rýhani-mádeni demalys syilady. Aita keteiik, «Kerýen sarai» týristik kesheninde osy apta sońynda «Kerýen sarai» týristik kesheninde Maqtaaral aýdanynyń mádeniet kúnderi ótedi dep josparlanýda.
