Túrkistanda sáýleti erekshe jańa meshit salynady, dep habarlaidy "Ult aqparat" aimaq ákimdiginiń baspasóz qyzmetine silteme jasap.
Túrkistan qalasyna kireberiste álemdegi ozyq tájiribelerdi ushtastyrǵan eńseli meshit boi kóteredi. Úkimet basshysy Asqar Mamin Túrkistan oblysyna sapary barysynda oblys ákimi Ómirzaq Shókeevpen birge Ózbekstan ókilderiniń qatysýymen Islam ortalyǵynyń irgetasyn qalady. Sáýleti erekshe Islam ortalyǵynyń ishki jáne syrtqy bezendirilýi shyǵystyq naqyshta júrgizilmek. Meshit aldaǵy 2020 jyly ashylady.
«Táýelsizdik kúni qarsańynda qolǵa alynǵan jańa joba jan-jaqty zerdelengen. Álem elderindegi ozyq tájiribeler de eskerilgen. Meshit irgesiniń berik bolýy úshin ózindik tehnologiia ázirlendi. Túrki áleminiń rýhani temirqazyǵy, qasietti Túrkistan qalasynda salynatyn jańa ǵibadat ornynda 5 myń jamaǵat bir mezgilde sájdege bas tigizip, qulshylyq ete alady. Meshit qurylysy zaman talabyna sai ozyq úlgide júrgizilmek. Islam ortalyǵynyń jalpy aýmaǵy – 20 000 sharshy metr» delingen habarlamada.
«Bul – baýyrlas eki el arasynda júzege asyrylyp jatqan igiligi mol, ortaq joba. Dini ǵimarat Uly Jibek joly boiy men kóne shaharǵa keletin týristerdiń qyzyǵýshylyǵyn arttyratyn taǵy bir úlken nysany bolady. Jalpy, Qazaqstan men Ózbekstan qarym-qatynasynyń áleýeti zor. Yntymaqtastyǵymyz kúnnen-kúnge nyǵaiyp, eki el arasyn jaqyndastyra beretinine senimdimin. Allanyń raqymy úshin jasalǵan jumystyń dúiim elge paidasy da mol bolsyn. Biregei jobaǵa qoldaý kórsetken Ózbekstan Respýblikasynyń Prezidenti Shavkat Mirziioevke rizashylyǵymdy bildiremin», – dep tilektestigin bildirdi Túrkistan oblysynyń ákimi Ómirzaq Shókeev.
Ózbekstan Respýblikasy resmi ókilderiniń málimetinshe, aýqymdy jobaǵa qurylys pen sáýlet salasynyń eń úzdik maitalmandary atsalysady.
Meshitte musylmandyq joralardy jasaityn oryndar, kongress-holl, neke saraiy, 400 oryndyq medrese, kitaphana, ashana salynady.
