Túrkistan tarihynda tuńǵysh ret qysqy sportpen kásibi túrde ainalysýǵa múmkindik jasalady, dep habarlaidy «Ult aqparat» oblys ákimdiginiń baspasóz qyzmetine silteme jasap.
Túrkistan oblysynyń ákimi Darhan Satybaldy Túrkistan qalasynyń damýynda asa mańyzdy birqatar qurylys nysandaryn aralady. Solardyń biri – qysqy sport túrlerine arnalǵan ǵimarat. Muz saraiynyń jalpy jer aýmaǵy 2 gektarǵa jýyq. Ǵimarat qurylysynyń kólemi – 4160,9 sharshy metr. Nysannyń qurylysy keler jyldyń kókteminde aiaqtalady dep josparlanǵan. Bul ǵimaratta qysqy sport túrleri damytylyp, úiirmeler ashylady. Jaqyn ýaqytta muz aidynyna kerekti qural-jabdyqtar satyp alynady.
Óńir basshysy Túrkistandy abattandyrý jumystary men birqatar qurylys nysandarynyń jai-kúiin baǵdarlaý úshin shahardy kezekti ret aralap shyǵyp, mádeni-tarihi ortalyqtaǵy abattandyrý jáne kógaldandyrý jumystaryn tekserdi.
Biyl Túrkistan qalasynda jalpy kólemi 200 myń sharshy metrden asatyn 3392 páterli 53 úidiń qurylysy júrgizilip jatyr. Túrkistan oblysynyń ákimi Darhan Satybaldy ákimshilik-iskerlik ortalyǵyndaǵy kópqabatty turǵyn úilerdiń jai-kúiimen tanysty. 5,7,9,12 jáne 20 qabatty 60 turǵyn úidiń qurylys alańynda boldy. Páterlerdiń jalpy aýdany 35 myń sharshy metrge jýyq.
«Salynyp jatqan úilerdiń sapasy talapqa sai bolýǵa tiis. Halyqtyń talaby men suranysyna jaýap berýi kerek. Bul – óte mańyzdy. Qurylys materialdarynyń sapasyna mán berińizder. Úilerdiń ainalasyn abattandyrý da asa mańyzdy. Balalarǵa arnalǵan alańdardyń sapasy men qaýipsizdigi – basty nazarda. Seismikalyq tózimdiligi qatań qadaǵalaýda bolýy mindetti. «Muz saraiy» da óz ýaqytynda salynyp, elge qyzmet kórsetýi qajet. Óńirde sportty damytýǵa da qolaily jaǵdai jasalady», – dedi Darhan Satybaldy.
Jyl basynan beri jańadan salynǵan 42 kópqabatty úi paidalanýǵa berildi. Iaǵni, nesiemen jáne kezekte turǵan 2 myńnan astam otbasy baspanaly bolyp, qonys toiyn toilady. Jyl sońyna deiin taǵy 11 kópqabatty turǵyn úi qurylysy tolyq aiaqtalady. Sol arqyly taǵy 725 páter paidalanýǵa beriledi.
Oblys ákimi qurylys jumystarynyń sapasyn qatań baqylaýda ustaýdy, injenerlik-infraqurylym júieleriniń qurylysy men abattandyrý jumystaryn shiratýdy tapsyrdy.
