Búgin Túrkistan qalasynda Máýlit merekesine orai «Shapaǵatshym bir ózińsiń, Muhammed s.a.ý» atty saltanatty is-shara ótti, dep habarlaidy «Ult aqparat» oblys ákimdiginiń baspasóz qyzmetine silteme jasap.
Is-sharada QMDB janyndaǵy «Zeket» qorynyń «El úlesi – páterge» jobasy aiasynda 6 muqtaj otbasyna baspana kilti tabystaldy.
Rýhani kesh Paiǵambar (s.a.ý) rýhyna Quran baǵyshtaýdan bastalyp, aitysker aqyn Bekarys Shoibekov merekege orai arnaý aityp, elimizdiń estrada juldyzdary Aidar Turǵanbekuly, Baqytjan Mustafaev ánnen shashý shashty. Sondai-aq qaladaǵy Raiymbek Seitmetov atyndaǵy sazdy drama teatrynyń ártisteri sahabalar dáýiri men olardyń ónegeli ómirinen jáne ata-ananyń qadiri týrasynda qoiylym sahnalap, kópshilikke erekshe áser syilady.
Túrkistan qalasy imamdarynyń uiymdastyrýymen ótken rýhani keshke qalanyń bas imamy Muhamedjan Ergeshbaiuly, qalalyq Ardagerler keńesiniń tóraǵasy Jarqynbek Qulbaiymbetov, qalalyq máslihat hatshysy Maqsat Asylbekuly, qalalyq máslihat depýtattary Ǵalymjan Batyrhanuly men Ardaq Úsenuly, Analar alqasynyń tóraiymy Uljan Ábenqyzy, qalalyq saiasi keńestiń múshesi Baqdáýlet Turmanov jáne qala turǵyndary qatysty. Sharaǵa qatysýshylar Máýlit merekesimen quttyqtap, igi iske muryndyq bolyp otyrǵan jandarǵa alǵystaryn jetkizdi. Keshtiń basty uiymdastyrýshysy Túrkistan qalasynyń bas imamy Mýhamedjan Ergeshbaiuly aldaǵy ýaqytta mundai igi bastamalar óz jalǵasyn tabatynyn jetkizdi.
Budan bólek, jyl basynan beri «El úlesi – páterge» jobasy aiasynda 4 muqtaj otbasy baspanaly bolǵan. Jyl sońyna deiin taǵy bir otbasyna páter kiltin tabystaý josparlanýda.
