Túrkistan qalasynda jastar jylyna orai alǵash ret kópfýnktsionaldy, jańa úlgidegi Jastar resýrstyq ortalyǵynyń ǵimaraty ashyldy, dep habarlaidy "Ult aqparat".
Saltanatty ashylý rásimine oblys ákimi Janseiit Túimebaev pen QR Qoǵamdyq damý vitse-ministri Juldyz Omarbekova, barlyq aýdan qala ákimderi, basqarma basshylary, respýblikalyq qoǵamdyq uiymdardyń ókilderi men 200-den astam belsendi jastar qatysty.
Óńir basshysy Janseiit Túimebaev jinalǵandardy Jastar jylynyń bastalýymen jáne jańa ǵimarattyń ashylýymen quttyqtady.
«Men búgin sizdermen ákim retinde emes, zamandastaryńyz retinde erkin pikir almasqym keledi. Óitkeni eń talantty, eń daryndy, eń otanshyl, eń eńbekqor jastar Túrkistan oblysynda turady dep esepteimin! Biyl jastar úshin erekshe jyl bolǵaly tur. Elbasymyzdyń tikelei tapsyrmasymen elimizde jastardy qoldaý baǵytyndaǵy jumystar kúsheitiledi. Oblysymyzda da josparlar jasalyp, naqty jumystar bastalyp ketti. Osy kezdesýdiń aldynda men jańadan ashylǵan ǵimaratty aralap, tanysyp shyqtym. Munda jastardyń jan-jaqty damýyna, boiyndaǵy óneri men qabiletterin arttyrýyna tolyq jaǵdai jasalǵan. Mysaly, kásipkerlikpen ainalysam deýshilerge Kovorking ortalyǵy, IT-park, zańgerlik keńester qarastyrylǵan. Sonymen birge, eriktiler klýby, «Jas sarbaz», elektrondy kitaphana, tilder mektebi, internet jelisi, májilis zaly, sport alańshalary jáne taǵy basqa igilikter bar. Bul - Sizder úshin jasalǵan úlken qoldaý. Endi osy jastar ortalyǵynda órenderimiz ózderin damytyp, bilimderin shyńdaýy tiis», - dedi Janseiit Túimebaev.
Kópfýnktsionaldy jańa úlgidegi Jastar ortalyǵy bir mezette 400-ge jýyq jasqa qyzmet kórsete alady. Ortalyqta «Jastarǵa qyzmet kórsetý» ortalyǵy, «Mobildi top», Turkistan HUB coworking zone, IT PARK, Robototehnika mektepteri, Kovorking alańy, elektrondy kitaphana, «Jas sarbaz», «Eriktiler mektebi», «Qurylys jasaqtary», «Tilder mektebi», túrli jastar uiymdary, media stýdiia jáne psihologiialyq terapiia sekildi kóptegen jastar klýbtary, mektepter men úiirmeler jumys jasaidy. Sondai-aq, ǵimarat ishinde «relax zone» demalys aimaǵy, ǵimarattyń syrtqy bóliginde fýtbol, voleibol, basketbol, tennis oinaýǵa arnalǵan sporttyq alańshalar ornalasqan.
Aita keteiik, búgingi tańda Túrkistan oblysynda jalpy halyqtyń 25,2 paiyzyn quraityn 501 369 jas bar. Onyń ishinde 86 416 jas qalalyq jerden bolsa, 414 953 jas aýylda turady. Sonymen qatar, aimaqtyń barlyq aýyl-qalalarynda jastarǵa qyzmet kórsetetin ákimdikke qarasty Jastar resýrstyq ortalyqtary men 4 respýblikalyq jastar uiymdarynyń filialy jáne etnomádeni ortalyqtar janynda jastar qanattary jumys isteidi.
