Túrkistan qalasynda Qoja Ahmet Iasaýi kesenesiniń mańyndaǵy "Jeti Tańdyr" meiramhanasynan órt shyqty, dep habarlaidy "Ult aqparat".
Qaznette janyp jatqan meiramhananyń videosy tarady. Jeli qoldanýshylary órt "Kerýen-sarai" aýmaǵynda bastalǵanyn jazyp jatyr. Biraq Túrkistan oblysynyń ákimdigi aqparatty joqqa shyǵardy.
Jergilikti biliktiń málimetinshe, órt "Kerýen-saraida" emes, Qoja Ahmet Iassaýi kesenesiniń mańynda bolǵan.
"16 maýsymda saǵat 11.48-de Túrkistanda "Áziret-Sultan" qoryq murajaiynyń qorǵalatyn aýmaǵynan tys ornalasqan eki qabatty "Jeti tandyr" kafesiniń 2-qabatynan órt shyqty. Órt bastalǵannan alty minýt ótken soń TJD-nyń alǵashqy qyzmetkerleri keldi. Qazirgi ýaqytta órt sóndirildi, qaza bolǵandar men zardap shekkender joq.
Aita keteiik, kafeniń "Kerýen sarai" oiyn-saýyq keshenine qatysy joq", - dep jazdy Túrkistan oblysy ákiminiń orynbasary Sáken Qalqamanov.
Al QR TJD baspasóz qyzmetiniń málimetinshe, órtti sóndirýge Túrkistan oblysy TJD, apattar meditsinasy ortalyǵynyń 28 qyzmetkeri men 11 tehnikasy jumyldyrylǵan.
"Órt saǵat 12.50-de oqshaýlandy. Órt kólemi naqtylanyp jatyr. Oqiǵa ornynda jedel shtab uiymdastyryldy. Ákimshiliktiń aitýynsha, órt sóndirý bólimsheleri kelgenge deiin kelýshiler ǵimarattan óz betinshe shyǵyp ketken. Zardap shekkender týraly aqparat túsken joq", - delingen habarlamada.
