Túrkistan oblysynda syrtqy saýda eksporty damyp, qarqyndy júzege asyrylýda. Óńirde otandyq taýar óndirýshilerdiń eksportyn ilgeriletý boiynsha belsendi jumys júrgizilýde, dep habarlaidy "Ult aqparat".
Aimaqta negizgi shikizattyq emes eksporttalatyn taýarlar qatarynda ýran, un, transformatorlar men balyq ónimderi jáne kúrketaýyq eti bar. Investorlar men eksporttaýshylarǵa «bir tereze» qaǵidaty boiynsha qyzmetterdiń keń túrin usynatyn «Turkiston Invest» qyzmet kórsetý ortalyǵy qurylǵan.
Sondai-aq, «Turkiston Invest» ortalyǵynyń kómegine júginýshi kásipkerlerdiń qatary da kóbeigen. Máselen, kompaniialar atalǵan ortalyqtyń kómegimen kólik qyzmetterine, sheteldik kórmelerge qatysýǵa jáne taýardy shetelde jarnamalaýǵa jumsalǵan shyǵyndardy óteý úshin ótinim bere alady.
Búginde «QazIndustry «SOO» AQ - na Túrkistan oblysynyń 18 eksporttaýshy kompaniiasy ótinim túsirgen. Onyń ishinde ótken jyly iske qosylǵan «CG Corp Global» JShS bar. Jylyna 400 myń tez daiyndalatyn kespe shyǵaratyn zaýyt ónimi búginde ishki jáne syrtqy naryqta da suranysqa ie.
Sonymen qatar, ótken jyly Qazaqstan men Qytai arasynda sút ónimderin eksporttaý boiynsha kelisim jasalǵan bolatyn. Nátijesinde «Golden Camel Group» zaýyty aǵymdaǵy jyldyń naýryz aiynan bastap Qytaiǵa 30 tonna qurǵaq túie sútin eksporttaǵan. Zaýyttyń óndiristik qýaty jylyna 33 myń tonnany quraidy jáne ónim tolyǵymen eksportqa sai keledi.
Al, taiaýda Ózbekstan Respýblikasynyń Ýrgench qalasynda ótken «agroónerkásiptik kooperatsiia, ónerkásip jáne týrizm salasyndaǵy óńirlik biznestiń yntymaqtastyǵy» II aimaqaralyq yntymaqtastyq forýmy aiasynda Túrkistan oblysy men ózbekstandyq kásiporyndar arasynda jalpy somasy 50 mln AQSh dollaryn quraityn 3 eksporttyq kelisimge qol qoiyldy.
Óńirde sondai-aq, eksportqa baǵdarlanǵan «Standard Petroleum» JShS munai óńdeý zaýyty boi kóteredi. Jańa zaýyt Ordabasy aýdanynda 2021 jyly iske qosylmaq. Eksport kólemi jylyna 2 mln aqsh dollaryn quraidy dep kútilýde. Joba iasynda myńnan astam jańa jumys orny ashylmaq. Jobanyń jalpy quny 95 mlrd teńgeni quraidy.
Aita keteiik, aǵymdaǵy jyldyń qańtar-aqpan ailarynda Túrkistan oblysynyń eksport kólemi 54,9 mln AQSh dollaryn (onyń ishinde shikizattyq emes eksport - 15 mln AQSh) quraǵan.
