Nur-Sultan qalasyndaǵy Ortalyq kommýnikatsiialar qyzmetiniń alańynda Túrkistan oblysynyń ákimi Ómirzaq Shókeev tikelei efirde baspasóz konferentsiiasyn ótkizdi. Ol óńirdiń ekonomikalyq-áleýmettik damýy jáne san túrli salada atqarylǵan jumystar týraly baiandady, dep habarlaidy "Ult aqparat".
«Ózderińiz biletindei, Elbasy N. Nazarbaevtyń Jarlyǵymen Túrkistan qalasynyń oblys ortalyǵy bolǵanyna nebári bir jyldan asa ýaqyt ótti. Ejelgi túrki áleminiń talbesigi – Túrkistan Elbasynyń strategiialyq mańyzy zor sheshiminen keiin damýdyń jańa satysyna kóterildi. Búginde 2 millionnan astam turǵyny bar óńirdiń tynys-tirshiligi jańasha qalypqa enip, oblys ortalyǵy – Túrkistan alyp qurylys alańyna ainaldy», - degen óńir basshysy qurylys jumysy talapqa sai júrip jatqanyn jetkizdi.
Qazir kóne shaharda óńir ákimdikteri, ulttyq kompaniialar jáne biznes ókilderi tarapynan 26 nysannyń qurylysy júrgizilýde. Ákimshilik-iskerlik ortalyǵynda oblys ákimdiginiń, basqarmalar ǵimarattary men Kongress-holl jáne mediaortalyqtyń, Nur-Sultan alańy, Q.A.Iassaýi murajaiy, oqýshylar saraiy, stadion, mýzykalyq mektep pen tsifrlyq keńse, basseini bar sport kesheni, smart-siti bailanys jelileri, olimpiadalyq rezervtegi sport mektebi men qalalyq saiabaq, týrizm baǵytyndaǵy kolledj jáne halyqqa qyzmet kórsetý ortalyǵy boi kóterýde. Biyl 11 nysan paidalanýǵa beriledi dep josparlanǵan.
Al ákimshilik-iskerlik ortalyqta jalpy 2351 páterlik 52 turǵyn úi jyl sońyna deiin paidalanýǵa beriledi. Qarasha aiynda 205 páterdi quraityn 7 úidiń qurylysy aiaqtalady. Jospar boiynsha qalǵan 610 páterlik 19 úi jyl sońyna deiin paidalanýǵa berilýi tiis.
