Túrkistanda jańadan jaryq kórgen «Bekzat» kórkem filminiń tusaýy kesildi. «Habar» agenttiginiń tapsyrysymen túsirilgen týyndy Sidnei Olimpiadasynyń chempiony, jasyndai jarq etken juldyz, boksshy Bekzat Sattarhanovqa arnalǵan, dep habarlaidy "Ult aqparat".
Kartinanyń tusaýkeserinde sóz alǵan «Habar» agenttigi AQ Basqarma tóraǵasynyń birinshi orynbasary Rinat Kertaev jer jahanǵa 20 jasynda óz eliniń atyn tanytyp ketken qaisar ul Sattarhanov barlyq igi iltipatqa laiyq ekenin atap ótti.
«Jasyndai jarq etken jas ǵumyrdyń erte úzilgeni qai-qaisymyzdyń da qabyrǵamyzdy qaiystyrdy. Bekzattai batyrdyń bolmysyn búgingi urpaqtyń jadyna jetkizý, búgingi urpaq sanasyna sińirý – barshamyzdyń paryzymyz. Sondyqtan da, «Habar» agenttigi, Sidnei Olimpiadasynyń chempiony, belgili boksshy - Bekzat Sattarhanov týraly tuńǵysh avtobiografiialyq «Bekzat» dramasyn taspalaýdy uiǵardy. Maqsatymyz - erte sóngen juldyzdyń sanaýly ǵumyryndaǵy jigerli jetistikterin, qaitpas qaisarlyǵyn, ultjandylyǵy men namysqoilyǵyn kórsetý arqyly búgingi jas urpaqty rýhtandyrý, jas sportshylarymyzǵa buqaralyq salaýatty ómir saltyn nasihattaý bolyp tabylady», - dedi ol.
Sondai-aq, filmniń alǵashqy kórsetilimine dańqty sportshynyń ata-anasy, týystary qatysty.
«20 jas ǵumyrynda qolynan kelgenshe eline barlyq kúsh-jigerin berip ketti. Bekzatqa qandai marapat, qandai kino shyǵarsa da artyq bolmas. Bekzatty jastardyń aldyna úlgi etip qoisa... onyń imandylyǵy, úlkendi syilaýy, qazaqylyǵy, birbetkeiligi, alǵa qoiǵan maqsatyn oryndaityn minezi qazirgi qazaq jastaryna kerek», - dedi marqum sportshynyń ákesi Seiilhan Sattarhanov.
Týyndy siýjetinde boksshy ómiriniń úsh kezeńi qamtylady: balalyq shaǵy, boz bala kezeńi jáne ómiriniń sońǵy sáti. 90-jyldardyń basyndaǵy qiyn-qystaý zamanǵa tap kelgen Bekzattyń balalyǵy kóp qiyndyqtarmen ótedi. Túrkistan qalasyndaǵy temir joldy boilai ornalasqan shaǵyn aýyldyń qarapaiym tirshiligi bala Bekzattyń kózimen beinelenedi. Onyń armany, namysqoi bitimi árbir sátte synalyp otyrady.
Birde ata-anasy Bekzatty kúreske qatyssyn dep bapkerge aparady. Onda ol sergektigimen kózge túsedi. Degenmen kúreske qatysqan balanyń boiy óspei qalady degen túsinikpen ony boksqa aýystyrady. Bapkerimen tanysqan kúnnen bastap, bul sport túrine erekshe mahabbaty ashylady. Kún saiyn erinbei jattyǵyp, alǵash ret Túrkistanda ótken saiysta jarqyrap kórinedi. Bozbala shaǵynda Germaniiada ótken týrnirde top jaryp, bapkerler Olimpiadaǵa daiarlaý jattyǵýlaryna qabyldaidy. 1999 jyly Tashkentte ótken búkil Aziia birinshiliginde kúmis júldege ie bolyp, Olimpiada oiyndaryna joldama alady. Osylaisha 2000 jyly Sidneide tartysty oiyndar ótkizip, altyn medalǵa ie bolady.
Kartinanyń rejisseri - Murat Bidosov, stsenariiin Serjan Zakeruly jazǵan.
Filmniń túsirilim jumystary Túrkistan, Almaty jáne Ystanbul qalalarynda ótken. Basty róldi jas akter Samat Ázimqulov oinaidy. Ol 2006-2007 jyldary kikbokstan jastar arasynda eki ret Qazaqstan chempiony bolǵan. Sonymen qatar týyndydan Ǵalymbek Ospanov, Murat Jarylqasynov, Maira Maqulbekova, Dýlyǵa Aqmolda, Qýanysh Muqatai, Baqdáýlet Shaimahan jáne basqa akterlerdi kórýge bolady.
Tolyq metrajdy kartina 3 qazannan bastap elimizdiń barlyq kinoteatrlarynda kórsetiledi.
