Túrkistanda 15 tamyz – Arheologtar kúnine orai «Farab» ǵylymi-ámbebap kitaphanasynda merekelik is-shara ótti. Jiynǵa Túrkistan oblysy ákiminiń orynbasary Sáken Qalqamanov, Oblystyq mádeniet basqarmasynyń basshysy Ázimhan Qoilybaev, elimizge belgili akademik, arheolog Baýyrjan Baitanaev bastaǵan zertteýshi ǵalymdar, mýzei basshylary men arheologiia salasynyń mamandary qatysty.
Aldymen qonaqtar úsh respýblikalyq jáne oblystyq, aýdandyq mýzeilerdiń qoryndaǵy arheologiialyq qazba jumystarynan tabylǵan qundy jádigerler qoiylǵan kórmeni tamashalady. «Dóńgelek ústelmen» jalǵasqan sharany Túrkistan oblysy ákiminiń orynbasary Sáken Amankeldiuly ashyp berip, arheologtardy kásibi merekesimen quttyqtady.
«Árine osy salada sheshimin tappai jatqan máseleler barshylyq. Óńirimizdegi eskertkishterge arheologiialyq qazba, ǵylymi-restavratsiia jáne konservatsiia jumystaryn júrgizip, abattandyryp, infraqurylymyn damytyp, ashyq aspan astyndaǵy mýzeige ainaldyrýymyz qajet. Osy baǵytta maman retinde sizderdiń pikirlerińiz biz úshin óte mańyzdy. Sol maqsatta búgin arheologtar kúnine sizderdi jinap otyrǵan jaiymyz bar», – dedi Sáken Qalqamanov.
Sodan soń «Arheologiia ǵylymy, ótkeni jáne bolashaǵy týraly» taqyrybymen arheolog, Qazaqstan Respýblikasy Ulttyq Ǵylym Akademiiasynyń akademigi Baýyrjan Baitanaev baiandama jasady. Jiynda sóz alǵan Á.Marǵulan atyndaǵy arheologiia institýtynyń direktory Aqan Ońǵaruly, «Túrkistan oblysy aýmaǵyndaǵy tarihi-mádeni eskertkishterdiń jai-kúii týraly» taqyrybymen «Tarihi-mádeni murany qorǵaý, qalpyna keltirý jáne paidalaný jónindegi ortalyq» direktory Qurban Jandos, «Áziret Sultan» mýzei-qoryǵynyń arheologiialyq zertteý jumystary týraly» taqyrybymen «Áziret Sultan» memlekettik tarihi-mádeni mýzei-qoryǵy direktorynyń orynbasary Nurhanov Baqytjan baiandama jasady. «Otyrar qalashyǵynda júrgizilip jatqan arheologiialyq jumystar týraly» taqyrybymen «Otyrar» memlekettik arheologiialyq qoryq-mýzeii direktorynyń orynbasary, gýmanitarlyq ǵylymdar magistri, arheolog Aqylbek Serik, Q.A. Iasaýi atyndaǵy HQTÝ-dyń Arheologiia ǵylymi-zertteý institýtynyń direktory Jetibaev Kópjasar osy saladaǵy túitkildi máseleler men atqarylyp jatqan jumystardy baiandady.
Jiyn barysynda arheologiia salasyna eńbegi sińgen mamandar arnaiy alǵys hatpen marapattaldy.
