Túrkistan qalasynyń mańynda diqandar egistikti AQSh-tan ákelingen arnaiy tehnika arqyly jańbyrlatyp sýara bastady. Mamandardyń aitýynsha, bul – óte tiimdi tásil. Osy bastama arqyly ónim túsimi eki-tórt esege deiin artady dep josparlanyp otyr, dep habarlaidy "Ult aqparat" óńirlik kommýnikatsiialar qyzmetine silteme jasap.
2018 jyly Elbasy N.Á.Nazarbaevtyń tarihi sheshimine sáikes, Túrkistan qalasy oblys ortalyǵy bolyp bekitilip, «Túrkistan oblysynyń áleýmettik-ekonomikalyq damytýdyń 2024 jylǵa deiingi keshendi jospary» qabyldanǵan bolatyn. Osy josparǵa sáikes, oblys ákimi Ómirzaq Shókeevtiń bastamasymen Túrkistan qalasy aýmaǵynda azyq-túlik beldeýin qalyptastyrý jáne sý nysandary jobalary iske asyryla bastady.
Keshendi jospar aiasynda agrarlyq salaǵa, onyń ishinde Túrkistan qalasy aýmaǵynda 11 myń ga alqapqa azyq-túlik beldeýin qalyptastyrý jáne aǵyn sý tapshylyǵyn joiý maqsatynda sý nysandary qurylysyn júrgizýge úlken basymdyq berilip otyr.
Biyl jyl basynda «Túrkistan Agro HHI» JShS bastamasymen 131 sharýa qojalyq birigip, nátijesinde «Yntymaq – 2019» kooperativi quryldy. Búginde atalǵan kooperativtiń 733 ga alqabyna 18 birlik jańbyrlatyp sýǵarý tehnologiiasy mashinasyn ornatý josparlanǵan. Jobanyń quny – 500,0 mln. teńge. AQSh-tyń «T-L» markaly tehnologiiasyn elimizge Niderlandynyń «APH Group B.V.» kompaniiasy jetkizgen. Sondai-aq munda 600,0 mln. teńgege «MTS qurý» jobasy iske asyrylýda. Jobalar «Agrarlyq nesie korporatsiiasy» AQ arqyly maquldandy. Bul qurylǵylarǵa memleket tarapynan sýbsidiia bólinip, sharýalarǵa úlken qoldaý kórsetilip otyr.
Túrkistan oblystyq aýyl sharýashylyǵy basqarmasynyń basshysy Nurbol Badyraqovtyń aitýynsha, búginde Túrkistan qalasy mańynda 4 birlik jańbyrlatyp sýarý mashinasy ornatylǵan.
«Qazir bul alqapqa kúzdik bidai egilip jatyr. Kelesi jyldyń mamyr aiynda súrlem júgeri egý josparlanǵan. Jańbyrlatyp sýarý tehnologiiasy arqyly daqyl túrine qarai ónimdilik 2-4 esege deiin artady. Mysaly bidaidan ortasha ónimdilik gektaryna 15 – 20 tsentner bolsa, tehnologiia arqyly ol 40 – 45 tsentnerge jetpek. Dándik júgeriden ár gektardan 48,5 tsentner alynsa, jańa tehnologiia arqyly ónim túsimin 115-130 tsentnerge deiin jetkizýge bolady. Jalpy, kelesi jyly Túrkistan qalasynyń ainalasyndaǵy alqaptarda jańbyrlatyp sýarý ádisi engiziledi. Osy arqyly azyq-túlik beldeýi qalyptasyp, eldiń áleýmettik jaǵdaiy kóterilip qana qoimai, qalanyń ekologiiasy aqýaly da jaqsarady», – deidi basqarma basshysy.
Búgingi tańda azyq-túlik beldeýi aýmaǵynda «Túrkistan Agro HHI» JShS «1200 basqa arnalǵan taýarly sút fermasy» jobasyn iske asyrýda. Budan bólek «SPK-SAURAN» AShÓK-i («Siti Stroi»JShS) «10 000 bas IQM bordaqylaý kesheni» jobasyn iske asyrý jumystaryn bastady. Sondai aq «SPK-SAURAN» AShÓK-i «1 myń gektar alqapta jańbyrlatyn sýarý júiesin ornatý» jobasyn qolǵa aldy. Qazir onda «Valmont Industries» kompaniiasynan 3 jańbyrlatqysh mashinalary jetkizilgen.
Budan bólek, jylyna qýattylyǵy 20 myń.tn. etti baǵyttaǵy qus fabrikasy («Standart oil»JShS), 500 ga zamanaýi jylyjai kesheni (YDA INSAAT túrik kompaniiasy), «Jylyna 2,5 myń tonna túie sútin qaita óńdeý kesheni» jobalary daiyndalýda.
Azyq-túlik beldeýin qalyptastyrý jobalary Túrkistan qalasy aýmaǵynan radiýsy 15 shaqyrym aýmaqta intensivti tehnologiialardy qoldana otyryp, ǵalymdardyń súiemeldeýimen júzege asyrylyp jatyr.
Keshendi jospar boiynsha jalpy 70 mlrd. teńgeni quraityn 8 iri investitsiialyq jobany iske asyrý kózdelgen. Nátijesinde jyl saiyn qosymsha 30,0 mlrd. teńgeniń aýyl sharýashylyǵy ónimi óndirilip, 2500-den astam jańa jumys orny qurylady degen senim bar.
