Túrkistan oblysynda jalpy óńirlik ónim kólemi 1 trln. 103,9 mlrd. teńgeni qurap, 2017 jyldyń tiisti kezeńimen salystyrǵanda ósim 103,9 % boldy. Kóptegen kásiporyndardyń qýatyn arttyryp, tehnologiialyq protsesti modernizatsiialaýdyń arqasynda ónerkásip sektorynyń ornyqty damýyna qol jetkizdildi. Bul jóninde oblys basshysy Janseiit Túimebaev halyq aldyndaǵy kezekti jyldyq esep berý jiynynda málimdedi.
«2018 jyly ónerkásip óniminiń kólemi 453,8 mlrd. teńgeni qurap, 43,1 mlrd. teńgege ósken. Óńdeý ónerkásibi de damyp keledi. Munda 236,9 mlrd. teńgeniń ónimi óndirilip, 13,7 mlrd teńgege artty. Indýstriialandyrý kartasy aiasynda 2018 jyly 10 joba iske asyrylyp, 800-den asa jumys orny ashyldy. Biyl indýstriialandyrý kartasy aiasynda investitsiialyq quny 11,9 mlrd.teńgeni quraityn 15 jobany iske asyrýdy josparlap otyrmyz», - dedi Janseiit Qanseiituly.
Byltyr oblystyń investitsiialyq klimatyn jaqsartý úshin Elbasy Jarlyǵymen Túrkistan qalasynda 1338 gektarda «TURKISTAN» arnaiy ekonomikalyq aimaǵy quryldy. Jumys istep turǵan shaǵyn jáne orta kásipkerlik sýbektileriniń sany – 130 804. Bul kórsetkish boiynsha oblys respýblikada ekinshi orynda.
Kásipkerlikti qoldaý maqsatynda «Ońtústik» aimaqtyq investitsiialyq ortalyǵy 2018 jyly 6 mlrd. teńgege 1 292 joba qarjylandyryp, 1 403 jumys orny ashylǵan bolatyn. Budan bólek, «Biznestiń jol kartasy 2020» baǵdarlamasy aiasynda 4,5 mlrd. teńge bólinip, 456 joba qoldaý tapty. Byltyr oblysqa 288,1 mlrd. teńge investitsiia tartyldy. Investorlarǵa «bir tereze» qaǵidatymen qyzmet kórsetetin «TURKISTAN INVEST» kompaniiasy qurylyp, qazir 1 mlrd. 147 mln. AQSh dollaryn quraityn, 14 000-nan astam jumys oryndarymen qamtamasyz etetin 24 iri investitsiialyq joba qoldaý tabýda. Sondai-aq, Túrkistanda alǵashqy ret «Kóne Túrkistan – jańa múmkindikter» atty halyqaralyq investitsiialyq jáne týristik Forým ótti. Atqarylǵan sharalardyń nátijesinde jeke investitsiia kólemi 166 mlrd. teńgege jetip, ósim 114,2% qurady.
Budan ózge, Túrkistan oblysy aýyl sharýashylyǵy ónimin óndirýde ózge oblystarmen salystyrǵanda kósh ilgeri. Ótken jyly 542,8 mlrd teńgeniń ónimi aýyl sharýashylyǵy salasynda óndirilip, ósim 105,3 paiyzdy quraǵan. Eksporttyń kólemi 180,9 mln. AQSh dollarǵa jetip, 20,2 mln. dollarǵa artty. Onyń ishinde, byltyr Qazaqstandaǵy et eksportynyń 54 paiyzdyq úlesi Túrkistan oblysyna tiesili bolyp, respýblikada 1-orynǵa shyqty.
